22 kandidatë për Kushtetuesen

Në zyrën e Presidentit të Republikës së Shqipërisë Ilir Meta ka pasur fluks aplikimesh për plotësimin e dy vendeve në Gjykatën Kushtetuese.

Për vendin vakant që la Sokol Berberi shprehën interes 22 kandidatë. 15 prej tyre kanë shprehur interes edhe për vakancën e përkohshme që u krijua pas dorëheqjes së Besnik Ymerajt.

Për listën e parë bien në sy emri i Kristaq Trajës dhe ish-kryeprokurorit Theodhori Sollaku, ndërsa interes për të dy vakancat kanë shprehur disa emra të njohur publikisht si prokurorët Rovena Gashi dhe Besnik Muçi, anëtari i KQZ-së, Denar Biba, apo dhe disa prej garuesve që nuk u bën dot anëtarë të Këshillit të Lartë Gjyqësor dhe Këshillit të Lartë të Prokurorisë.

Sipas Kushtetutës, Këshilli i Emërimeve në Drejtësi bën vlerësimin e kandidatëve dhe i rendit sipas meritës profesionale. Presidenti i Republikës zgjedh anëtaret mes kësaj liste.

Por Këshilli i ri i Emërimeve në Drejtësi u zgjodh pa vetting. Pikëpyetja që ngrihet është nëse KED do të bëjë renditjen e kandidatëve para, apo pas verifikimit nga organet e vettingut.

Lista e kandidatëve:

Alban Brati, Avni Shehu, Besnik Muçi, Dedë Kasneci, Denar Biba, Gëzim Allaraj, Ilir Mustafaj, Ilir Panda, Kristaq Traja, Luan Dervishi, Petrit Kaja, Rexhep Bekteshi, Sinan Tafaj, Theodhor Sollaku, Vladimir Gërmenji, Ardita Alsula, Arta Vorpsi, Elsa Toska, Regleta Panajoti, Rovena Gashi, Valbona Bala dhe Zhaklina Peto /Tch/Telegrafi/