113 vjetori i Kongresit të Manastirit – Shumë pengesa për zbatimin e ligjit për përdorimin e gjuhëve në Maqedoni

113 Vjetori i Kongresit të Manastirit u shënua edhe në Shkup. Dita e Alfabetit të Gjuhës Shqipe zbatimin e ligjit për përdorimin e gjuhëve në vend e gjeti pothuajse gjysmak. Kjo pasi gjithçka ka mbetur në vullnetin e Institucioneve, sepse Inspektorati për Zbatimin e Ligjit ende nuk ka nisur me punën në terren.

“Normalisht që kur të fillojnë inspektorët të dalin në terren, atëherë normalisht që kërkesa do të jetë më e madhe. Agjencia ka kapacitet dhe ka ekip efikas për t’u dalë në ndihmë të gjitha institucioneve”, tha Ylber Sela- drejtor i Agjencisë për Zbatimin e Gjuhëve.

Drejtori i Inspektoratit për Zbatimin e Gjuhëve, Fatmir Iseni, na informoi se nga java e ardhshme planifikojnë të nisin me inspektimet në terren. Edhe pse Ligji është sjellë që në fillim të vitit 2019, ka ende dokumente të cilat qytetarëve nuk u jepen në dy gjuhë.

Një rast i tillë është edhe me plotësimin e disa formularëve për marrje të vërtetimeve nga Gjykatat Themelore, të cilat pranohen vetëm nëse plotësohen në alfabetin cirilik. Zv. kryeministri Artan Grubi, tha se qytetarët kanë të drejtë të refuzojnë pranimin e dokumentit për sa kohë që i njëjti nuk u jepet në gjuhën që e kërkojnë.

“Qytetarët kanë plotësisht të drejtë të mos pranojnë një formularë të tillë dhe të kërkojnë të mbushin formularin edhe në gjuhën shqipe. Unë jam i bindur se edhe Gjykatat, edhe Prokuroria do të adresojnë përdorimin e Gjuhës Shqipe, sepse e kanë detyrim ligjor. Uroj që të kenë kapacitetet e mjaftueshme njerëzore për ta zbatuar atë. Nëse nuk i kanë, jemi në proces të angazhimit të 160 përkthyesve në kuadër të Ministrisë për Sistem Politik”, u shpreh Artan Grubi – ministër për Sistem Politik dhe Marrëdhënie mes Bashkësive.

Në shënimin e Ditës së Alfabetit, Agjencia për Zbatimin e Gjuhëve promovoi librin “ Gjuha Shqipe para dhe pas miratimit të Ligjit për Përdorimin e Gjuhëve.” Në këtë libër të përgatitur nga 6 autorë bëhet një studim shkencor mbi nivelin e zbatimit të këtij ligji në vendin tonë./ Alsat.mk