Zyra e kryeministrit punon për Ditën e Evropës

Kosova, të enjten feston Ditën e Evropës 9 majin,  datë kjo e cila është ditë pune për qytetarët e vendeve të Bashkimit Evropian (BE).

Edhe, zyra e kryeministrit së Republikës së Kosovës në “Ditën e Evropës”, do të punoj ashtu siç ka bërë edhe vitin e kaluar.

Kështu tha zëdhënësja e qeverisë Donjeta Gashi në emisionin “Zyra e Ankesave”, në RTV Dukagjini,  ku sipas saj kryeministri më 9 maj ka agjendë të përcaktuar për të kryer obligimet shtetërore, transmeton Telegrafi.

Ndërkaq, gazetari i emisionit i kërkoi Gashit që t’ia përcjell një kërkesë kryeministrit, Ramush Haradinaj që ta rishikoj edhe njëherë këtë datë si festë zyrtare, në mënyrë që të hiqet nga kalendari i festave.

Mirëpo, Gashi tha se nuk është procedurë e lehtë që të ndryshohet një ligj, edhe pse është punuar në një koncept dokument për këtë kalendar të festave.

“Ne më 9 maj kemi punë, kemi agjendë gjithë ditën…As vitin e kaluar nuk kemi pushuar dhe as këtë vit. Është punuar diçka si koncept dokument, por ka kërkesa të mëdha që duhet të ndryshohen. Nëse ndryshohet kjo datë, duhet të ndryshohet ligji në tërësi. Është pak e komplikuar në këtë multietnicitet që po jetojmë dhe multikulturalitet. Për tu ndryshuar ligji merr shumë kohë”, ka thënë Gashi.

Ndryshe, ligji ka gjithsej 11 festa dhe respektohet në tërësi nga institucionet publike.

Festat zyrtare në Kosovë, të përcaktuara me ligj janë: Viti i Ri, Dita e Pavarësisë së Republikës së Kosovës, Dita e Kushtetutës së Republikës së Kosovës, Dita Ndërkombëtare e Punës, Dita e Evropës, Bajrami i Madh, Bajrami i Vogël, Krishtlindjet Katolike, Krishtlindjet Ortodokse, Pashkët Katolike, si dhe Pashkët Ortodokse.

Përveç këtyre festave, në Kosovë sipas Ligjit janë të përcaktuara edhe tetë ditë tjera memoriale.

Data 28 nëntor shënohet si Dita e Flamurit të shqiptarëve dhe 12 Qershori – Dita e Paqes, e që për të dy ditët pushohet.

Kurse gjashtë festat tjera memoriale i përkasin ditës se komuniteteve të ndryshme që jetojnë në Kosovë. /Telegrafi/