Zgjedhjet në Moldavi, qytetarët votojnë për presidentin e ri dhe anëtarësimin në BE

Vendvotimet janë hapur në të gjithë Moldavinë me qytetarët që marrin dy vendime: kush duhet të jetë presidenti i tyre i ardhshëm dhe nëse vendi duhet të anëtarësohet në BE.

Kudo në spektrin politik, qytetarët duan paga më të larta dhe një cilësi më të mirë jetese – por opinioni në Moldavi është i ndarë nëse anëtarësimi në BE do të sigurojë një të ardhme të ndritur.

Bëhet e ditur se disa janë skeptikë se anëtarësimi do të sjellë ndryshime, ndërsa të tjerë preferojnë të mbajnë një marrëdhënie të përzemërt me Rusinë.

“Asgjë e mirë”, tha një burrë në kryeqytetin Kishinau kur u pyet se cilat ishin pritshmëritë e tij.

“Kur në gjithë këto vite nuk kanë bërë asgjë. Dhe rrugët janë plotësisht të prishura. Nuk kam parë askënd të bëjë mirë deri tani, as këta politikanë dhe as të tjerët. Nuk shoh ndonjë shpresë për të ardhmen”, shtoi ai.

Por të tjerë mendojnë se anëtarësimi në BE do të përmirësojë standardet e jetesës dhe do të rrisë pagat, diçka që ka shtyrë shumë të rinj të largohen nga vendi në kërkim të pagave më të mira diku tjetër.

Siç raportohet, paga minimale aktuale në Moldavi është vendosur në 5,000 leu (261 €) në muaj, një nga më të ulëtat në Evropë, shkruan euronews, përcjell Telegrafi.

Një analizë e fundit nga grupi i pavarur i mendimit Idis Viitorul tregoi se më shumë se 200,000 moldavë ishin larguar nga vendi në katër vitet e fundit, një numër rekord.

Të dhënat tregojnë gjithashtu se më shumë se 40% e moldavëve që jetojnë jashtë vendit janë midis 30 dhe 44 vjeç — dhe pritet që deri në vitin 2030, numri i moldavëve të lindur jashtë të jetë më i lartë se i atyre të lindur në vend.

“Zgjedhja është e qartë: ose Moldavia aderon dhe vazhdon të përparojë drejt Perëndimit, drejt anëtarësimit në Bashkimin Evropian, ose tërhiqet zvarrë nga përfaqësuesit rusë”, tha Iulian Groza, drejtor ekzekutiv në Institutin për Politikat dhe Reformat Evropiane.

Sondazhet tregojnë mbështetjen e moldavëve për anëtarësimin në BE në rreth 60%.

Presidentja aktuale e Moldavisë, Maia Sandu, e cila kandidon për rizgjedhje, ka qenë një avokate e vendosur për anëtarësimin në BE dhe në një aktivitet të fushatës së fundmi, u kërkoi votuesve të mbështesin pranimin.

“Për rreth 20 vjet ne kemi folur për Moldavinë në Bashkimin Evropian dhe jemi shumë afër tani dhe është shumë, shumë e rëndësishme të mos e humbisni këtë mundësi”, tha Sandu.

Ndryshe, Moldavisë iu dha statusi i kandidatit për në BE në vitin 2022.

E që referendumi të konsiderohet i vlefshëm nevojitet një pjesëmarrje prej 33%.

Në fillim të këtij muaji, autoritetet moldave paralajmëruan se rreth 14 milionë euro fonde ruse ishin derdhur drejtpërdrejt në llogaritë e 130,000 moldavëve në një përpjekje për të blerë votat e tyre kundër BE-së.

Oligarku pro-rus Ilan Shor, i njohur për drejtimin e operacioneve të fshehta të Kremlinit në Moldavi, ka ofruar gjithashtu publikisht para për votat kundër integrimit në BE.

Kishinau vlerëson se Rusia ka shpenzuar deri në 100 milionë euro në total për të minuar procesin zgjedhor, duke përfshirë fushatat e koordinuara të dezinformimit të krijuara për të ndikuar ose shtypur votimin.

Në fillim të kësaj jave, kryeministri i Moldavisë, Dorin Recean këshilloi votuesit të qëndrojnë vigjilentë.

“Kohët e fundit janë intensifikuar tentativat destabilizuese nga grupet kriminale, të kontrolluara nga jashtë”, tha Recean.

“Ju takon ju të dashur qytetarë të ndaloni sulmin ndaj demokracisë. Të dielën ju bëni zgjedhjen: të kthehemi në të kaluarën, vetëm, pa burime zhvillimi, të pambrojtur ndaj sfidave, apo do të shkojmë drejt të ardhmes në familjen e vendeve të qytetëruara”, shtoi ai. /Telegrafi/