Zgjedhjet e 9 shkurtit, mediat do të lejohen të vëzhgojnë numërimin e fletëvotimeve në vendvotime

Komisioni Qendror i Zgjedhjeve (KQZ) do të lejojë që mediat e akredituara të vëzhgojnë procesin e numërimit të fletëvotimeve në vendvotime për zgjedhjet e Kuvendit të Kosovës që do të mbahen më 9 shkurt 2025.

Kështu ka bërë të ditur për Telegrafin, zëdhënësi i KQZ-së, Valmir Elezi.

Elezi ka shtuar se kjo do të lejojë që përfaqësuesit e mediave të filmojnë dhe fotografojnë procesin e numërimit, duke respektuar gjithmonë të dhënat e mbrojtura me ligj.

“Ne e shohim transparencën si një çështje kyçe në rritjen e besueshmërisë së qytetarëve në proceset zgjedhore. Besojmë se ky është një hap jashtëzakonisht i madh që do të ndikojë në disa drejtime: do të sjellë transparencë më të madhe të procesit zgjedhor, rritje të besueshmërisë së qytetarëve sidomos në numërin e fletëvotimeve në vendvotime dhe siguri për subjektet politike”, ka thënë Elezi.

Ai theksoi gjithashtu: “Dua të sigurojmë që anëtarët e Këshillit të Vendvotimit të numërojnë fletëvotimet pa u penguar, pasi saktësia në numërim është e domosdoshme.”

KQZ beson se realizimi i kësaj mundësie do të jetë i lehtë dhe do të kontribuojë në një proces zgjedhor më të besueshëm dhe më të sigurt për të gjithë qytetarët. /Telegrafi/