Zekirija Ramadani flet për kundërshtarin e Dritës në Ligën e Konferencës

Trajneri i Dritës, Zekirija Ramadani, sot (19 korrik) ka dhënë një deklaratë për kundërshtarin me të cilin Drita do të ballafaqohet në Ligën e Konferencës.

‘Intelektualët’ do ta kenë përballë Breidablikun e Islandës ku fillimisht përballja e parë do të luhet në Islandë më datë 25 korrik, ndërsa ajo e kthimit në ‘Fadil Vokrri’ më datë 30 korrik.

Ramadani ka thënë se ata kanë ndjekur dy ndeshjet që Breidablik i ka zhvilluar në raundin e parë të Ligës së Konferencës ndaj Tikveshit, duke e cilësuar atë si një ekip të fortë.

“Kemi ndjekur dy ndeshjet që janë zhvilluar në raundin e parë të Conference League në mes të Tikveshit dhe Breidablikut”.

“Mendoj që Breidablik është konkurrent i fortë dhe përparësia e tyre është se ata janë duke zhvilluar ndeshje në kampionat dhe janë në formën e tyre optimale ndërsa për ne është ndeshja e parë zyrtare për sezonin 2024/25”, ka thënë fillimisht Ramadani.

Tutje, ai tha që përkundër cilësisë që posedon klubi islandez, ai ka besim tek ekipi i tij dhe se shpreson që të arrijnë synimet që i kanë.

“Kam besim shumë të madh tek grupi i lojtarëve të mi dhe besoj shumë që me kualitetin që posedojmë si ekip, do të arrijmë synimet tona që kemi si klub”, vazhdoi tutje Ramadani.

Në fund ai konfirmoi mungesën e sulmuesit Blerim Krasniqi i cili për shkak të kartonëve nuk do të jetë në dispozicion të tij për këtë ndeshje.

Për këtë ndeshje do të kemi mungesën e sulmuesit Blerim Krasniqi i cili për shkak të kartonëve nga ndeshja e fundit ne garat e Evropës vitin e kaluar, por në atë pozitë e kemi sulmuesin tonë të ri Arb Manaj i cili është i gatshëm për këtë ndeshje sikurse të gjithë lojtarët tjerë”, përfundoi ai./Telegrafi/