Xi i Kinës fiton mandatin e tretë, mbush ekipin drejtues me besnikë të tij

Xi Jinping i Kinës siguroi të dielën një mandat të tretë lidershipi të paprecedent dhe prezantoi një Komitet të ri të Përhershëm të Byrosë Politike të mbushur me besnikë të tij, duke çimentuar vendin e tij si sundimtari më i fuqishëm i vendit që nga Mao Ce Duni.

Shefi i Partisë Komuniste të Shangait, Li Qiang, 63 vjeç, e ndoqi Xi në skenën në Sallën e Madhe të Popullit ndërsa u prezantua ekipi i ri drejtues, që do të thotë se ai ka të ngjarë të pasojë Li Keqiang si kryeministër kur të dalë në pension në mars, përcjell Telegrafi.

Anëtarët e tjerë të Komitetit të Përhershëm prej shtatë anëtarësh, organi më i lartë qeverisës i Kinës, janë Zhao Leji dhe Wang Huning, të cilët kthehen nga komiteti i mëparshëm, dhe të sapoardhurit Cai Qi, Ding Xuexiang dhe Li Xi.

Li Qiang është gjithashtu i ri në Komitetin e Përhershëm.

Të gjithë perceptohen të kenë besnikëri të ngushtë me Xi, 69 vjeç, i cili gjithashtu u riemërua të dielën si kryetar i Komisionit Qendror Ushtarak.

Zbulimi i Komitetit të Përhershëm dhe i Byrosë Politike më të madhe prej 24 anëtarësh vjen një ditë pas mbylljes së Kongresit të 20-të të Partisë Komuniste në pushtet, ku u shtuan ndryshime në statutin e partisë që synojnë çimentimin e statusit thelbësor të Xi dhe rolin drejtues të tij politik brenda partisë. /Telegrafi/