Xhaka: Isha i pafat

Mesfushori shqiptar Granit Xhaka ende kujtohet për humbjen e penalltisë ndaj Polonisë, çka i sjelli eliminim Zvicrës nga Kampionati Evropian, shkruan albinfo.ch.

E përditshmja zvicerane ‘Blick.ch’, është rikthyer të flas sërish për Xhakën, për të cilin kanë vetëm fjalë të mira, duke i dalë në ndihmë mesfushorit shqiptar.

Sipas kësaj të përditshme, 23-vjeçari po rritet dita-ditës dhe është lideri i mesfushës së Zvicrës. Më tej kjo e përditshme shkruan se si mesfushori i ri i Arsenalit qëndronte një hap me Toni Kroosin sa i përket pasimeve të kompletuara në Evropian.

I pyetur për atë penallti të humbur ndaj Polonisë, ai është përgjigjur: “E di se çfarë kam bërë. E godita shumë keq topin, isha i pafat. Dikush duhet të bëjë gabim në ekzekutimin e penalltive, fatkeqësisht ai isha unë”, ka thënë Granit Xhaka për ‘Blick.ch’.

Sidoqoftë, në mbrojtje i kishte dal Xhakës edhe trajneri Vladimir Petkoviq, i cili kishte thënë: ‘penalltitë janë si lotari, dhe ne humbëm’.

Xhaka është duke i shijuar pushimet verore me të dashurën e tij para se të rikthehet në Londër për t’i nisur përgatitjet për sezonin e ri me ‘Topçinjtë’.