Vuçiq fton Kosovën të bëhet pjesë e “Ballkanit të Hapur”: Do të jetë më lehtë për shqiptarët dhe serbët të mos ketë kufij

Presidenti i Serbisë, Aleksandër Vuçiq ka thënë se janë të hapur për bashkëpunim me Kosovën në kuadër të “Ballkanit të Hapur”, por nuk ka treguar nëse do të pranonte Kosovën si shtet të jetë pjesë e diskutimeve të kësaj nisme rajonale.

Në konferencën për medie në Tiranë , pas arritjes së disa marrëveshjeve në kuadër të “Ballkanit të Hapur”, Vuçiq tha se pikëpamjet e ndryshme për Kosovën nuk duhet të ndalin bashkëpunimin, sidomos në nivelin ekonomik.

“Ne kemi pikëpamje të ndryshme lidhur me Kosovën. Serbia, Shqipëria dhe Maqedonia e Veriut kanë pikëpamje të ndryshme për Kosovën. Po ashtu pikëpamje të ndryshme kanë edhe Beogradi dhe Prishtina, por kjo nuk është arsye që ne mos të flasim dhe kjo nuk është arsye se dikush mos të jetë pjesë e ‘Ballkanit të Hapur’. Ne mund të përmendim pikat e kalimit kufitar në Jarinje midis Kosovës dhe Serbisë, apo drejt Luginës së Preshevës. Megjithatë, a do të jetë më lehtë mes shqiptarëve dhe serbeve nëse nuk ka të tillë kufij, që njerëzit të lëvizin lirisht”, tha Vuçiq, transmeton KP.

“Nuk besoj se ka njeri që nuk do të binte dakord me këtë që po e them unë. Nuk mendoj se është produktive që ftoj dikë nga Prishtina, do të thoni se meqenëse ai po bënë ftesën nuk do të vij. Por në qoftë se më pyesni për problemet që ata të vinin dhe do të zgjidhnin statusin e çështjes politike, kjo është në juridiksionin e dialogut në Bruksel, por sa u takon çështjeve ekonomike dhe lirive të jemi të gatshëm të punojmë së bashku për të punuar brenda ‘Ballkanit të Hapur’”, tha ai.

Gjatë ditës së sotme në Shqipëri janë nënshkruar një sërë marrëveshjesh në kuadër të iniciativës “Ballkani i Hapur”.