Vrasja e Ivanoviq dhe zhvillimet për Specialen, në raportin e Sekretarit të OKB-së

Kërkohet gjetja dhe dënimi i vrasësve të Ivanoviq, fuqizimi i zbatimit të ligjit, si dhe përshëndeten zgjedhjet e lira dhe demokratike, në nivel lokal dhe qendror, në raportin e sekretarit Guterres

Sekretari i Përgjithshëm i Organizatës së Kombëve të Bashkuara, António Guterres, ka publikuar raportin e tij për zhvillimet në Kosovë, ku theks të veçantë kanë vrasja e liderit të serbëve në Kosovë, Oliver Ivanoviq, dhe tentimi për të shfuqizuar Ligjin për Gjykatën Speciale.

Situata në veri në Kosovës përshkruhet përgjithësisht e brishtë, me një numër incidentesh të raportuara, ndërsa vrasja e Ivanoviq cilësohet si e atillë që ka mundur të prodhojë pasoja shumë më të mëdha se vetëm në veri.

Në sferën e dialogut me Kosovës dhe Serbisë, përshëndeten disa veprime. nga të dyja shtetet, drejt implementimit të marrëveshjeve të arritura deri tash, si edhe nisja e dialogut të brendshëm në Serbi për  këtë çështje, si dhe theksohet mungesa e çfarëdo ideje për afatin kohor të funksionalizimit të Bashkësisë së Komunave me shumicë serbe.

Raporti përmend edhe dënimin e aktivistëve të Lëvizjes Vetëvendosje për sulmin ndaj Kuvendit të Kosovës, vazhdimin e gjykimit të zëvendëskryeministrit Fatmir Limaj, por edhe shumicën e ngjarjeve kyçe në drejtësinë kosovare.