Vrasja e 14-vjeçarit pranë shkollës, PD kërkon dorëheqjen e ministres së Arsimit

Vrasja e 14-vjeçarit pranë shkollës “Fan Noli” në kryeqytet, ku ishte nxënës, përfshiu në debat Parlamentin.

Edhe pse mazhoranca u përpoq të heshte në seancë për këtë ngjarje të rëndë, ishte opozita që me ngulm kërkoi dorëheqjen e Ministres së Arsimit, duke e bërë përgjegjëse për mosreagimin e shkollës ndaj një konflikti të paralajmëruar që përfundoi në tragjedi.

Në mungesë të Ogerta Manastirliut e cila zgjodhi që të mos qëndrojë në Parlament, qeveria u mbrojt me Ministrin e Shtetit për Marrëdhënien me Parlamentin.

Taulant Balla e përgjithësoi përgjegjësinë ndërsa shqetësimin e demokratëve e cilësoi jo të sinqertë.

Paketa e sigurisë në shkolla për demokraten Zhupa është vetëm një propagandë e qeverisë. Ndërsa Balla ftoi opozitën që të bëhen bashkë për të ashpërsuar masat që lidhen sigurinë në institucionet e arsimit.

Politika e shprehu në bllok nga foltorja e Parlamentit keqardhjen për humben e jetës së adoleshentit, por socialistëtët nuk arritën të bëhen bashkë me demokratët për të mbajtur një minutë heshtje për adoleshentin që humbi jetën, pas propozimit të opozitës.

14-vjeçari Martin Cani humbi jetën të hënën pasi u godit me thikë në zemër nga një tjetër nxënësi shkollës “Fan Noli”, pas një konflikti që kishte nisur fillimisht në rrjetet sociale disa ditë më parë, për të kaluar më pas në konfrontim fizik në ambientet e shkollës dhe jashtë saj./A2 CNN