Votohet përbërja e Komisioneve Parlamentare në Kuvend

Me 104 vota për, asnjë kundër dhe asnjë abstenim, Kuvendi i Kosovës ka miratuar përbërjen e Komisioneve Parlamentare.

Kjo seancë plenare ishte thirrur pikërisht për të votuar për përbërjen e Komisioneve Parlamentare.

Ndryshe, shefja e GP të Lëvizjes Vetëvendosje, pas mbledhjes së Kryesisë së Kuvendit kishte bërë të ditur ditë më parë se Grupi Parlamentar i LVV-së do të udhëheq me 7 komisione nga 14 gjithsejtë.

“Grupi parlamentar i LVV-së do të kryesojë me komisionin për buxhet punë dhe transfere, komisionin për legjislacion mandate dhe imunitete, komisionin për punë të jashtme, komisionin për arsim, shkencë, teknologji dhe ndërmarrësi, komisionin për bujqësi, komisionin për shëndetësi, si dhe komisionin për qeverisje lokale”, kishte thënë Kusari-Lila.

Lexo po ashtu Nga 14 Komisione Parlamentare, LVV do të udhëheq me shtatë prej tyre

“Ndërkaq nënkryetar do të kemi në komisionin për të drejta dhe interesat e komuniteteve, komisionin për integrim evropian, komisionin për ekonomi, komisionin për industri, ndërmarrësi e tregti, komisionin për çështje të sigurisë, komisionin për të drejtat e njeriut, komisionin për financa publike, dhe komisionin për mbikëqyrjen e AKI-së”, tha Kusari-Lila.

Ajo shtoi se në këto komisione LVV do të jetë e përfaqësuar nga 5 deputetë, dy do të jenë nga PDK, një nga LDK, një nga Lista Serbe dhe një nga 6+.

Kusari-Lila shtoi se seanca e radhës e Kuvendit do të mbahet të premten në orën 10:00, ku do të bëhet betimi i deputetëve të rinj dhe formimi i komisioneve. Ndërsa votimi për zgjedhjen e presidentit, deputetja Mimoza Kusari-Lila tha se do të bëhet në një seancë tjetër për të cilën ende nuk është bërë e ditur kur do të mbahet./Telegrafi/