Vietnami fillon rihapjen e shkollave pas mbylljes njëvjeçare për shkak të COVID-19

Më shumë se 17 milionë nxënës vietnamezë do të kthehen në shkollë të hënën për herë të parë në rreth një vit, tha ministria e shëndetësisë, pasi autoritetet njoftuan planet për të filluar vaksinimin e fëmijëve nga mosha pesë vjeç kundër COVID-19.

Sipas mediave të huaja, përcjell Telegrafi, vendi i Azisë Juglindore hoqi shumë nga kufizimet e tij të coronavirusit në tetor, por pothuajse të gjithë nxënësit ishin kufizuar në orët e mësimit në internet që nga fillimi i vitit të kaluar.

Ndërkohë shumica e shkollave në vend do të rihapen nga mesi i shkurtit, tha ministria e shëndetësisë në një deklaratë.

Në një deklaratë të veçantë në fundjavë, qeveria tha se synonte të blinte 21.9 milionë doza të vaksinës Pfizer-BioNTech për fëmijët e moshës nga pesë deri në 12 vjeç.

Më shumë se 75% e 98 milionë njerëzve të Vietnamit kanë marrë të paktën dy vaksina dhe autoritetet synojnë të administrojnë një dozë përforcuese për të gjithë popullsinë e rritur deri në fund të marsit.

Shkollat në kryeqytetin Hanoi do të fillojnë të rihapen nga e marta, me masa paraprake si kontrollet e temperaturës dhe protokollet në fuqi në rast se zbulohen raste pozitive, thanë autoritetet.

Ndryshe, Vietnami arriti të “përmbajë” coronavirusin për pjesën më të madhe të vitit 2020 përpara se varianti Delta të nxiste infeksionet vitin e kaluar.

Ministria e Shëndetësisë tha se vendi raportoi 14,112 raste të reja të dielën. Në përgjithësi, Vietnami ka raportuar 2.34 milionë infeksione COVID-19 dhe më shumë se 38,300 vdekje. /Telegrafi/