Vetëvendosje pret diasporën në Vërmicë, kërkon votën e tyre (Video)

Një autobus nga diaspora në Gjermani ka arritur në Kosovë, ndërkaq në kufi të Vërmicës i kanë pritur anëtarët e Vetëvendosje, ku me ta ishin dhe ish-deputetët Faton Topalli dhe Mytaher Haskuka.

Topalli i uroi mirëseardhje qytetarëve të Kosovës të cilët jetojnë në diasporë, duke iu thënë se gjatë qeverisjes se VV-së, askush nuk guxon t’i marr haraç në kufi me kartonin  e gjelbër.

“Na keni sjell një sinjal dhe mesazh të mirë që mërgata është me VV dhe ndryshimin. Ne ju dua jo vetëm për të votuar, ju duam si deputet të kuvendit, si ministra e si ekonomist”, tha ai.

Pa ashtu edhe Haskuka tha se diaspora është ajo që ka bërë ndryshime në Kosovë.

“Më 11 qershor do të bëjmë ndryshimin  e madh që i duhet Kosovës . Ju jeni ata që e mbani Kosovën dhe gjithmonë ju trajtojnë në mënyrë jo të duhur. Me qeverisjen e VV, do t’ju mundësohet që të integroheni dhe të investoni  me kapacitetin qe e kemi në diasporë dhe Kosovë”, ka thënë Haskuka.

Ndërkaq, një qytetar i diasporës  sapo kaloi kufirin me veturën e tij, iu drejtua anëtarëve të VV-së, duke thënë se mos ka ndonjë dasmë dhe se do ta votojë AAK-në.