Veseli i shqetësuar me deklaratat e Erdoganit: Nuk i nënshtrohemi presioneve të jashtme

Një ditë pas deklaratave kërcënuese të presidentit turk Rcep Tayyip Erdogan, në adresë të kryeministrit të Kosovës , Ramush Haradinaj, ka reaguar kryetari i Kuvendit të Kosovës, Kadri Veseli,  duke thënë se ndjehet i befasuar dhe i shqetësuar nga deklaratat e presidentit turk.

Veseli, përmes një postimi në Facebook, i ka cilësuar si shqetësuese deklaratat e Erdoganit, pasi ato, sipas tij, vijnë nga një vend mik i Kosovës.

Postimi i plotë i Veselit:

“Jemi të befasuar me deklarimet e Presidentit te Republikës së Turqisë, z. Rexhep Taip Erdogan, të drejtuara ndaj Kryeministrit të Republikës së Kosovës, z. Ramush Haradinaj, në një kohë kur institucionet e Republikës së Kosovës po trajtojnë në hollësi veprimet që çuan në arrestimin dhe deportimin nga Kosova në Turqi të gjashtë shtetasve turq.

Këto deklarata janë shqetësuese, sepse vijnë nga lideri i një vendi mik, mbështetja e të cilit shtet është dëshmuar në vazhdimësi para dhe gjatë gjithë ekzistencës së shtetit tonë. Andaj, deklarimet e tilla nuk i kontribuojnë forcimit të miqësisë dhe bashkëpunimit te ndërsjellë, për çka vendi ynë ka qenë dhe është i përkushtuar.

Veprimet e institucioneve të Republikës se Kosovës janë sovrane dhe si të tilla nuk mund t’u nënshtrohen presioneve të jashtme. Në këtë drejtim, edhe marrja në përgjegjësi e bartësve të institucioneve të sigurisë është çështje e brendshme dhe në diskrecion të lidershipit të Kosovës.

Republika e Kosovës do të vazhdojë pa kompromis rrugën e vet evropiane, të forcimit te vlerave perëndimore dhe demokratike, duke ofruar bashkëpunimin e vet me të gjitha ato shtete mike që duan raporte të respektit të ndërsjellë, duke përfshirë edhe Republikën e Turqisë” , ka shkruar Veseli. /Telegrafi/