Veseli shpjegon edhe njëherë “Fillimin e Ri”

Kreu i Partisë Demokratike të Kosovës, Kadri Veseli gjatë tubimit zgjedhor në Klinë, ka përsëritur edhe njëherë programin për qeverisje që ka koalicioni PDK-AAK-Nisma, në rast se dalin fitues më 11 qershor.

“Duhet të punojmë shumë për këtë shtet, të bëjmë më shumë për këtë shtet, duhet të ndërtohet ky shtet të jetë i fuqizuar ekonomikisht që të jemi krenar me të, ky është Fillimi i Ri. Kjo është e ardhmja e Kosovës”. Fillimi i Ri nuk e ndanë Kosovën, as nuk i përçan vëllezërit dhe motrat, i mbanë të bashkuar”.

“Ekonomia jonë do të jetë më e fuqishme. Fillimi i Ri është ndërmarrësi, do të fuqizojmë të gjitha bizneset që kanë mundësi të prodhojnë. Biznese të suksesshme, prodhues të suksesshëm, vend punime për të rinjtë dhe të rejat tona”.

Veseli tha se Fillimi i Ri është fuqizim i bujqësisë, që krijojnë produkte ushqimore e të njëjtën kohë punësojnë të rinj dhe të reja. “Fillimi i Ri- fuqizim i rinisë, rinia është e sotshmja e tashmja, rinia duhet ta ndërtojë këtë vend”.

“Do t’i përkrahim që të jenë të gatshëm për liri, shtet, sovranitet e fuqizim ekonomik. Fuqizim i rolit të gruas, nuk mund të ketë shtet pa fuqizim të gruas. Për 4 vite Kosova do të pesëfishoj eksportet sepse nëse i pesëfishojmë arrimë tek një bilanc i barabartë tregtar”, tha Veseli.

“Duhet të orientohemi më shumë nga eksportet, në sektorin e prodhimit, do të rrisim pagat, ju jep fjalën për 4 vite për 30 % do të rriten pagat në gjithë sektorin publik të Kosovës”.

“Kushte të rehatshme për pensionistët, do t’i mbrojmë e do t’i përkrahim, të gjithë ata që kanë kontribuar për lirinë e Kosovë, familjarë të dëshmorëve, ata që dhanë gjymtyrë të trupit të tyre, do t’iu ndihmojmë atyre që kanë mundësi t’i japin kontribut Kosovës , personat me aftësi të veçanta”.

“Më 11 qershor Kosova vendos për 4 vitet e ardhshme, ne jemi partia e shtetndërtimit, e paqes, e lirisë”, tha Veseli,  njofton Klan Kosova.