Vendet evropiane që janë ‘në garë kundër kohës’ ndërsa po zbulojnë raste të reja me variantin e COVID-19, Omicron

Danimarka u bë vendi më i fundit evropian që konfirmoi rastet e variantit të ri të COVID-19, Omicron, të dielën.

Autoritetet shëndetësore daneze thanë se kishin regjistruar dy raste te udhëtarët nga Afrika e Jugut.

Një lajm i tillë vjen pasi Holanda, Gjermania, Republika Çeke, Italia, Britania e Madhe dhe Belgjika gjithashtu njoftuan se kishin zbuluar raste të llojit të ri të coronavirusit, përcjell Telegrafi.

Ndërkohë, Austria ka zbuluar rastin e parë të dyshimtë të llojit Omicron në Tirol, njoftuan autoritetet.

Pasagjeri që u kthye nga Republika e Afrikës Jugore javën e kaluar ishte pozitiv me indikacione për një variant të ri, megjithëse nevojitet një sekuencë e mëtejshme për konfirmim në ditët në vijim, njoftuan autoritetet në Tirol.

Lexo po ashtu Varianti Omicron mbërrin edhe në Kanada - dy persona rezultojnë pozitivë pas kthimit nga Nigeria

Mostra tani do t’i dërgohet Agjencisë Austriake për Shëndetin dhe Sigurinë e Ushqimit për testime të mëtejshme.

Në anën tjetër, ministri francez i Shëndetësisë, Olivier Veran tha se, ndërsa vendi i tij nuk kishte ende raste të konfirmuara, “ka të ngjarë që aktualisht të ketë raste në qarkullim”.

Ndërsa duke folur në një konferencë për shtyp të dielën, presidentja e Komisionit Evropian, Ursula von der Leyen tha se një “garë kundër kohës” ishte duke u zhvilluar për të trajtuar variantin Omicron.

13 raste të konfirmuara në Holandë

Autoriteti i shëndetit publik holandez konfirmoi të dielën se 13 persona që mbërritën në Holandë me fluturime nga Afrika e Jugut të premten deri më tani kanë rezultuar pozitivë për variantin e ri të coronavirusit, Omicron.

Sipas Euronews, përcjell Telegrafi, 61 personat që rezultuan pozitivë për virusin të premten pasi mbërritën në dy fluturimet e fundit në aeroportin Schiphol të Amsterdamit përpara se të vendosej një ndalim fluturimi, u izoluan menjëherë ndërsa u krye sekuenca për të përcaktuar nëse kishin variantin e ri.

Instituti i shëndetit publik tha në një deklaratë se testimi po vazhdonte në mostrat.

Shumica e 61 personave që rezultuan pozitivë u vendosën në izolim në një hotel afër aeroportit, ndërsa një numër i vogël u lejuan të qëndrojnë në karantinë në shtëpi nën kushte të rrepta.

Autoritetet shëndetësore u bënë thirrje të gjithë udhëtarëve që u kthyen nga Afrika Jugore javën e kaluar që të testohen dhe të krijojnë një qendër testimi në aeroportin Schiphol për qytetarët holandezë që kthehen nga rajoni.

Testet janë vullnetare dhe udhëtarët mund të presin rezultatet në izolim në shtëpi.

Britania e Madhe vendos kufizime të reja udhëtimi

Mbretëria e Bashkuar njoftoi se një rast i tretë i Omicron u zbulua të dielën.

Vendi fillimisht kishte raportuar dy raste të konfirmuara që Sekretari i Shëndetësisë, Sajid Javid tha se ishin “të lidhura dhe se kishte një lidhje me udhëtimin në Afrikën jugore”.

Infeksionet e variantit të ri, për të cilin provat paraprake sugjerojnë se mund të jenë shumë të transmetueshme dhe më rezistente ndaj trajtimit aktual, duke përfshirë vaksinat, e shtynë kryeministrin Boris Johnson të shtrëngojë kushtet e hyrjes në vendin e tij.

“Ne nuk do t’i ndalojmë njerëzit të udhëtojnë, por do t’i kërkojmë kujtdo që hyn në Mbretërinë e Bashkuar të bëjë një test PCR deri në fund të ditës së dytë pas mbërritjes së tyre dhe të izolohen derisa të kenë një rezultat negativ”, tha Johnson gjatë një konferencë për shtyp të shtunën pasdite.

Javid kishte thënë më herët në Twitter se dy personat e infektuar janë duke u izoluar me familjet e tyre dhe po kryhet gjurmimi i kontakteve.

Lexo po ashtu Sa është më i rrezikshëm Omicroni nga Delta, shkencëtarët italianë shfaqin grafikën për numrin e efekteve të mutacionit

“Si një masë paraprake ne po bëjmë testime shtesë të synuara në zonat e prekura – Nottingham dhe Chelmsford – dhe vlerësojmë të gjitha rastet pozitive”, shtoi ai.

Ai gjithashtu njoftoi se edhe disa vende si Mozambiku, Zambia dhe Angola janë shtuar në listën e kuqe të udhëtimit të vendit, së bashku me Afrikën e Jugut, Botsvanan, Namibia dhe Zimbabve dhe të tjera që u shtuan në fillim të kësaj jave.

Kjo do të thotë që udhëtarët nga këto vende duhet të rezervojnë një qëndrim në një hotel karantine.

Gjermania, Italia, Belgjika, Republika Çeke gjithashtu raportojnë raste të Omicron

Numri i përgjithshëm i rasteve në Gjermani u rrit në tre të dielën, sipas informacionit të lëshuar nga zyrtarët shëndetësorë në shtetin e Hesse.

Dy infeksione të konfirmuara të Omicron u raportuan fillimisht nga Ministria e Shëndetësisë bavareze të shtunën, shkruan tutje Euronews, përcjell Telegrafi.

Dy personat e infektuar u kthyen nga Afrika e Jugut më 24 nëntor dhe janë vendosur në izolim.

Autoritetet shëndetësore të Gjermanisë u bënë thirrje pasagjerëve nga i njëjti fluturim që të raportojnë tek autoritetet e tyre shëndetësore lokale sa më shpejt të jetë e mundur dhe për këdo që ka vizituar Afrikën e Jugut brenda dy javëve të fundit të bëjë një test PCR.

Instituti i Lartë i Shëndetit i Italisë (ISS) gjithashtu njoftoi të shtunën në mbrëmje se një rast i parë i variantit Omicron ishte zbuluar në Itali në një person që kishte qenë së fundmi në Mozambik.

“Pacienti dhe familjarët e tij janë në gjendje të mirë shëndetësore”, thuhej në një deklaratë.

Republika Çeke gjithashtu zbuloi një rast të parë të llojit të ri te një pacient me COVID-19. Gruaja është shtruar në spital me simptoma të lehta në Liberec, në veri të vendit.

Këto informata vijnë një ditë pasi Belgjika u bë shteti i parë anëtar i Bashkimit Evropian që raportoi një rast nga një udhëtar që kthehej nga Egjipti, përcjell Telegrafi.

Autoritetet holandeze ndërkohë po bëjnë sekuencën e mostrave nga 61 pasagjerë nga dy avionë që ktheheshin nga Afrika e Jugut të premten dhe të cilët rezultuan pozitivë për COVID-19.

Shtetet anëtare të BE-së mbyllën kufijtë e tyre të premten për udhëtarët nga shtatë vende të Afrikës Jugore – Botsvana, Eswatini, Lesoto, Mozambiku, Namibia, Afrika e Jugut dhe Zimbabve – për shkak të variantit.

Vendimi erdhi disa orë përpara se Organizata Botërore e Shëndetësisë (OBSH) t’i jepte variantit, të njohur fillimisht si B.1.1.529, emrin e tij dhe ta etiketonte atë një “variant shqetësues”.

Agjencia shëndetësore e Kombeve të Bashkuara theksoi se “provat paraprake sugjerojnë një rrezik në rritje të infeksionit” me ekspertët të shqetësuar gjithashtu se “numri i madh i mutacioneve” të variantit e bëjnë atë më imun ndaj trajtimit aktual, përfshirë vaksinat.

Vende të tjera që kanë vendosur kufizime udhëtimi me vendet e Afrikës së Jugut përfshijnë Kanadanë dhe SHBA-në. /Telegrafi/