Vëllaznimi shënon fitore të rëndësishme ndaj Borës

Sot në Palestrën “Shani Nushi” në Gjakovë është zhvilluar ndeshja e parafundit e xhiros së 12-tënë Superligën e Kosovës, në mes të Vëllaznimi dhe Borës, ndeshje e cila është mbyllur me rezultatin 89:79, në të mirën e skuadrës nga Gjakova.

Të parët që llogarinë e pikëve e hapën ishin basketbollistët e skuadrës së Borës, por më pas ishin gjakovarët që e morën tërësisht kontrollin e lojës, ku në një moment epërsia e skuadrës gjakovare arriti në 24 pikë.

Skuadra e Borës arriti që në çerekun e fundit ta ulë epërsinë e skuadrës gjakovare deri në 5 pikë, por loja e mirë që skuadra nga Prishtina bëri në çerekun e fundit nuk mjaftoi, pasi që gjakovarët sërish morën iniciativën dhe e mbyllën këtë ndeshje me fitore.

Basketbollisti më i dalluar te Vëllaznimi ishte përforcimi më i ri i skuadrës Jericole Hellems, i cili shënoi 17 pikë, bëri 2 kërcime e dhuroi 2 asistime, ndërsa te Bora u dalluan Alex Lomax dhe Adem Mekic, ku secili këtë ndeshje e mbyllën me 14 pikë të shënuara.

Pas përfundimit të kësaj xhiroje Vëllaznimi e dërgon bilancin e skuadrës në 5 fitore e 7 humbje, kurse Bora që ka një ndeshje më pak të zhvilluar, pas kësaj ndeshjeje bilancin e ka 2 fitore e 9 humbje. /Telegrafi/