Vdiq Maxhun Alimehaj, njëri nga të mbijetuarit e masakrës së Lybeniqit

Maxhun Alimehaj nga Lybeniqi i Pejës ka ndërruar jetë.

Ai ishte një nga 10 të mbijetuarit e masakrës që forcat serbe kryen më 1 prill 1999, duke pushkatuar 70 bashkëfshatarë të tij.

Lajmin  e bëri të ditur historiani Shkodran Imeraj, përmes një postimi në Facebook.

“Ai, nga breshëria e plumbave të forcave serbe mori disa plagë, të cilave iu mbijetoi me shumë vështirësi. Maxhunin, kam pasur rast ta takoj disa herë dhe ta intervistoj si një nga të mbijetuarit e Masakrës së Lybeniqit të 1 prillit të vitit 1999. Dëshmia e tij ishte vërtet rrëqethëse dhe kjo dëshmi tashmë ka hyrë në analet e historisë sonë në librin Masakrat në Lybeniq 1998-1999,” ka shkruar Imeraj.

Ai shtoi se ndarja nga jeta e Alimehajt përbën një humbje të madhe jo vetëm për familjen e tij, por edhe për gjithë shoqërinë.

“Vdekja e sotshme e Maxhunit është një humbje e madhe, ngase nga sot është shuar edhe një dëshmi e gjallë e krimeve të gjenocidit serb në Kosovë.”

Varrimi do të bëhet nesër (e hënë), më 14:00, në varrezat e dëshmorëve në Lybeniq.