Vdekja e gruas në Podujevë, Bajrami kërkon veprime konkrete nga Qeveria kundër qenve endacakë

Kandidatja për deputete nga radhët e LDK-së, Hykmete Bajrami, ka bërë një thirrje urgjente ndaj Qeverisë Kurti për të marrë masa kundër rrezikut të qenve endacakë.

Reagimi i saj vjen pas lajmit tragjik se një grua në Podujevë ka humbur jetën nga një sulm në zemër, pasi u frikësua teksa ndiqej nga qentë endacakë.

Bajrami e cilëson këtë situatë të papranueshme dhe kërkon reagim të menjëhershëm institucional.

Ajo thekson se pas 26 vitesh nga lufta, është e turpshme që qytetarët ende rrezikojnë jetën nga problemet e pazgjidhura si ky.

Lexo po ashtu Një grua humb jetën nga sulmi në zemër pas ndjekjes nga qentë në Podujevë

Ajo i bën thirrje kryeministrit në detyrë që të thërrasë urgjentisht në takim Asociacionin e Komunave dhe të sigurojë fonde për një strategji të përbashkët e efektive për trajtimin e qenve endacakë në nivel shtetëror.

“Kjo situatë nuk mund të lihet pas dore. Nevojiten veprime konkrete dhe të menjëhershme, jo vetëm deklarata. Nëse institucionet nuk mund të garantojnë sigurinë e qytetarëve, atëherë cili është qëllimi i tyre?”, thekson ajo.

Në fund, Bajrami shpreh ngushëllimet e saj për familjen e viktimës nga Podujeva./Telegrafi/