Vazhdon përkrahja për prodhuesit e qumështit

Sektori i qumështit, viteve të fundit ka gjetur një përkrahje të madhe financiare nga institucionet vendore e të huaja, ku përmes granteve dhe subvencioneve ku sektor ka arritur që të bëhet më i leverdishmi në vend. Edhe fermerët, që merren me këtë sektor, tregojnë se përkrahja që kanë marrë ka ndikuar në zgjerimin e veprimtarive të tyre, si dhe në modernizimin e teknologjisë që përdoret për prodhimin dhe përpunimin e qumështit.

E mbështetja për prodhuesit e qumështit është duke vazhduar edhe sivjet nga Ministria e Bujqësisë, e cila përmes granteve invesitve dhe subvencioneve për qumësht sipas cilësisë synon zhvillimin e mëtejmë të këtij sektori.

Zyrtarë të kësaj ministrie tregojnë se subvencionimi i qumështit sipas cilësisë është një nga programet për mbështetjen e këtij sektori me qëllim që të stimulohet ngritja e cilësisë së qumështit, sigurimin e lëndës së parë cilësore për industrinë përpunuese dhe ruajtjen e shëndetit të konsumatorit. “Për këtë vit janë siguruar shuma prej 1.5 milion euro për mbështetjen e fermerëve që prodhojnë qumësht të klasëve: ekstra, Klasa I dhe II sipas legjislacionit në fuqi dhe marrë parasysh deri më tani nuk është raportuar për ndonjë parregullsi në këtë proces”, thonë zyrtarë të MBPZHR-së.

Sipas tyre, sektori i qumështit mbështetet përmes tre programeve, ku përpos subvencionimit të sektorit sipas cilësisë që u përmend më parë, ky sektor subvencionohet edhe për njësi krerë për lopët qumështore dhe të imëtat ( delet dhe dhitë) në prodhimtarinë aktive të qumështit, e po ashtu në mënyrë indirekte ky sektor përfiton edhe nga subvencionimi i misrit, i cili kryesisht përdoret për ushqimin e bagëtisë, prandaj shuma e përgjithshme për mbështetjen e fermerëve prodhues të qumështit për këtë vit është 5,800,000 ( pesë milion e tetëqind mijë euro).

Po ashtu, në MBPZHR tregojnë se industria përpunuese e qumështit mbështet edhe përmes granteve investive, ku vetëm gjatë këtij viti MBPZRH-ja këtë industri e ka mbështetur me një vlerë prej 1 milion euro. Gjithashtu, kjo industri përmes granteve investive mbështetet edhe nga Komisioni Evropian.

Ndërkaq, Zenel Kadriu nga Celina e Rahovecitthotë se blegtorinë e kanë traditë familjare. Ai thekson se nëse fermerët kanë përkrahje nga institucionet atëherë do të ishte një lehtësim për punën e tyre.

“Blegtorin e kemi traditë familjarë, aktualisht kam pesë krerë lopë qumështore, enë total kam 12 krerë. Deri më tash nuk kam pas përkrahje sepse nuk e kam pas numrin e mjaftueshëm për të përfituar nga Ministria e Bujqësisë. Sivjet kam aplikuar dhe po pres të na përkrahin”, tha ai.

Kadriu thotë se përkrahja me subvencione për fermerët është një lehtësirë e madhe. “Po nëse na ofrohet përkrahje do të ishte një lehtësirë e madhe për ne pasi që do të na lehtësonte shumë marrjen me blegtori pasi që me 300 euro, mund tu blejë 100 thasë me krunde për lopët”, tha ai.

Ai tregon nuk është i kënaqur shumë më çmimin e shtijës së qumështit i cili aktualisht për litër shitet në rreth 30 centë.

Blegtori Zenel Kadriu nga Celina e Rahovecit thekson se ka plane për të rritur numrin e krerëve në stallën e tij, por për të pasur një rritje të dukshme duhet të ketë përkrahje financiare./FermaIme/Telegrafi/