Vazhdon gjendja emergjente në Suharekë, banorët kërkojnë ndihmë

Gjashtë ditë pas vërshimeve, Suhareka me fshatra për rreth ende është në gjendje emergjente.

Rreth 50 përqind e fshatrave të kësaj komune pësuan dëme materiale. Gjatë kësaj situate u raportua për tetë persona të lënduar, të cilët kanë marrë tretman mjekësor. Aty ka ndërhyrë edhe FSK dhe Kryqi i Kuq. Ndërkohë, është vlerësuar se dëmet materiale nga kjo katastrofë natyrore kanë kaluar shifrën 6 milionë euro.

Ekipi i KosovaPress ka vizituar fshatin Sopi të kësaj komune, i cili cilësohet si një nga fshatrat me më së shumti dëme.

Disa nga banorët e këtij fshati kanë treguar se komuna u ka sjellë disa formularë për të regjistruar dëmet, si dhe thasë me gëlqere, por ata thanë se dezinfektimin e shtëpive po e bëjnë vet.

Ukë Ndrecaj rrëfehet dëmët që shkaktoi uji dhe rëra në shtëpinë e tij.

“Na ka vërshuar katin përdhes komplet, nja 60 centin ka hy lumi brena. Dëme na kanë ba një lavatriçe, friza, një zmadhues të rrymës dhe disa tesha, ka pas tepiha, syngjera, ato i ka mbushë me rërë nja 10 centin katin përdhes”, ka thënë Ndrecaj.

Ai ka treguar se vërshimet i kanë dëmtuar edhe serrën. Ndërsa, ka shtuar se po e presin komunën që t’i dalë në ndihmë më tutje. Sipas tij, këto vërshime kanë ardhur si pasojë e ngushtimit të shtratit të lumit.

“Me u pas hapë shtrati i lumit, nuk besoj që kish ardhë deri te kjo katastrofë. Na kërkojmë që me na pastru fshatin, këtë lumin e fshatit, edhe me marrë një iniciativë komuna”, ka thënë Ndrecaj.

Dëme materiale në këtë fshat, në lagjen e Mazrekëve, ka pasur edhe familja e Kujtim Mazrekut. Edhe kryefamiljari Mazreku ka thënë se vërshimet nëpër shtëpi u kanë ndodhur si shkak i ngushtimit të shtratit të lumit dhe mbeturinave që ndodhen në lumë. Ai ka treguar se vërshimet ia kanë dëmtuar katin e parë të shtëpisë, punëtorinë e mobilieve dhe tri vetura.

“Tri vetura janë prishë aty. Njana u kanë e vajzës, 80 mijë euro ka kushtu ai kerr, ajo u kanë bijë e imja, edhe nja të djalit dhe një timin, tri kerret i ka prishë”, ka thënë Mazreku.

Ai ka treguar se komuna i ka vizituar dhe ka thënë se po shpresojnë që t’ua kompensojnë dëmet materiale.

Në të njëjtën lagje, u dëmtuan nga vërshimet edhe tri shtëpi që ndodheshin pranë lumit. Këto shtëpi i përkasin tre kushërinjëve Mazreku.

Njëra nga banoret e cila nuk ka dashur të prononcohet para kamerave, ka thënë se vet janë marrë me pastrimin dhe dezinfektimin e shtëpive. Ajo ka treguar, se kryefamiljari B. Mazreku nga lodhja e tepërt dhe stresi, ka pësuar sulm në zemër dhe për momentin gjendet në trajtim mjekësor në Prishtinë.

“Gjendet në spital për shkak të lodhjes që e kemi pastru shpinë, ka pësu infrakt, e kanë dërgu në Prizren, pastaj prej Prizrenit në Prishtinë”, ka thënë L.M.

Kurse, Enver Shabani, drejtor i Shërbimeve Publike, Mjedis dhe Emergjencë në komunën e Suharekës, ka thënë se komuna i ka vizituar fshatrat dhe po bën verifikimin e dëmeve.

Ai ka treguar se tashmë u kanë dërguar thasë me gëlqere për dezinfektim dhe ka thënë se shpresojnë që t’i përkrah edhe qeveria për rimbursimin e dëmeve materiale.

“Kapaciteti i komunës së Suharekës nuk ka mundësi me i plotësu të gjitha damet, mirë po besojmë dhe shpresojmë që qeveria, buxheti i qeverisë do të na ndihmon. Sa i përket buxhetit të komunës së Suharekës, është shumë i ulët, mundësitë janë të vogla”, ka thënë Shabani.

Ndërkohë, fshatrat Grejkoc, Sopi dhe Nëpërbisht i ka vizituar kryeministri Ramush Haradinaj, së bashku me disa nga ministrat dhe zëvendësministrat e Qeverisë së Kosovës, si dhe kryetarin e Suharekës, Bali Muharremaj.

Haradinaj ka premtuar që qeveria do t’i ndihmojë në kompensimin e dëmeve materiale.

Komuna e Suharekës deri tash ka ndarë 430000 mijë euro, kurse, Qeveria ka premtuar se në mbledhjen e nesërme do të ndaj 1.1 milion euro. /Telegrafi/