Situata në veri, SHBA-të kërkojnë veprime të përgjegjshme nga Kosova dhe Serbia

01/06/2023 15:33-Mes tensioneve në veri, Kurti takon ambasadorin Hovenier

Kryeministri i Kosovës, Albin Kurti, ka pritur këtë të enjte në takim ambasadorin e Shteteve të Bashkuara të Amerikës, Jeffrey Hovenier.

Lajmin për Telegrafin e kanë konfirmuar nga Qeveria e Kosovës, teksa kanë thënë se është takim i rregullt javor.

Ky takim vjen në kohën kur situata në veri është tensionuar.

Tensionet në atë pjesë të Kosovës u rritën qysh më 26 maj, kur Policia e Kosovës ndihmoi kryetarët shqiptarë të komunave me shumicë serbe të hyjnë në zyrat komunale, përkundër rezistencës së banorëve lokalë.

E SHBA-ja e kritikoi Qeverinë Kurti për veprimet e saj dhe e sanksionoi Kosovën me mospjesëmarrje në stërvitjet ushtarake “Defender Europe 2023”.

Ndryshe, kryeministri Kurti gjatë ditës në një deklarim për media, i pyetur për raportet ndërmjet Kosovës dhe SHBA-së, ka thënë se ato janë shkëlqyeshme, mirëpo ka raste kur dallojnë në qasje.

01/06/2023 15:17-Blinken nga Olso kërkon nga Kosova dhe Serbia që të ulin tensionet në veri

Sekretari amerikan i Shtetit, Antony Blinken, ka folur sërish për situatën në veri të Kosovës.

Nga Oslo, Blinken u kërkoi krerëve të Kosovës dhe Serbisë që menjëherë të ndërmarrin masa për të ulur tensionet, duke paralajmëruar se ata po rrezikojnë aspiratat e integrimit evropian.

Ai tha se shumë aleatë shprehin shqetësimin për rritjen e tensioneve në veriun e Kosovës dhe i dënojnë fuqishëm sulmet e fundit ndaj KFOR-it, kolegëve tanë italianë dhe hungarezë që u lënduan në atë sulm.

“Ne u bëjmë thirrje qeverive të Kosovës dhe të Serbisë që të ndërmarrin hapa të menjëhershëm për të ulur tensionet. Normalisht se ne mbështesim procesin për integrimin euroatlantik të Kosovës dhe Serbisë, por situata aktuale e pengon dhe s’e ndihmon lëvizjen në atë drejtim”, u tha Blinken gazetarëve.

Blinken ka reaguar edhe më herët, duke kërkuar nga Kosova që të mos hyjë me forcë në objektet komunale në komunat verore.

Reagimet ndërkombëtare erdhën pas aksioneve të Policisë së Kosovës, më 26 maj, në tri komunat në veri të Kosovës, Zubin Potok, Zveçan dhe Leposaviq, për të siguruar qasjen në objektet komunale të kryetarëve të ri të këtyre tri komunave.

01/06/2023 14:59-Policia thotë se sulmi ndaj dy shqiptarëve në veri u krye nga një grup kriminelësh – të njëjtit pranuan tretman mjekësor

Policia e Kosovës ka konfirmuar sulmin ndaj dy qytetarëve shqiptarë sot në veri të Mitrovicës.

Përmes një njoftimi për media, policia bëri të ditur se të dy qytetarët kanë qenë duke qëndruar në hyrje të sheshit në veri të Mitrovicës, ku pastaj janë sulmuar nga një grup kriminelësh të cilët kanë qenë të maskuar dhe të organizuar për sulmin e kryer.

“Njësitet policore kanë intervenuar menjëherë për të parandaluar sulmin, përderisa personat e dyshuar kanë ikur në drejtime të ndryshme të qytetit. Si pasojë e sulmeve dy viktimat kanë pësuar lëndime trupore dhe të njëjtit janë dërguar për trajtim mjekësor”, thuhet në njoftim.

Policia shton se aktet e tilla kriminale, nuk i shërbejnë sigurisë dhe qetësisë publike, iu shërbejnë vetëm individëve apo grupeve të caktuara kriminale.

“Policia e Kosovës do të vazhdojë angazhimet e saja policore, me qëllim të parandalimit, hetimit dhe ofrimit të sigurisë ndaj të gjithë qytetarëve në nivel vendi”, thuhet në njoftim.

01/06/2023 14:31-Sveçla: Protestuesit po detyrohen të nënshkruajnë në lista pjesëmarrjen e tyre, këto taktika duhet të ndalen

Ministri i Punëve të Brendshme, Xhelal Sveçla, tha të enjten se pas kushtëzimeve për të marrë pjesë në protesta e organizime të drejtuara nga Lista Serbe, protestuesit po detyrohen të nënshkruajnë në lista pjesëmarrjen e tyre.

Sipas tij, haptazi ky është një mjet për të ndërmarrë veprime të mëvonshme ndaj atyre që nuk kanë qenë prezent në protestë.

Ai tutje u shpreh se serbët e Kosovës në vazhdimësi janë nën trysni dhe kërcënime që të kryejnë veprime jashtë vullnetit të tyre.

“Pas kushtëzimeve për të marrë pjesë në protesta e organizime të drejtuara nga Lista Serbe, protestuesit sot po detyrohen të nënshkruajnë në lista pjesëmarrjen e tyre në protestë. Haptazi ky është një mjet për të ndërmarrë veprime të mëvonshme ndaj atyre që nuk kanë qenë prezent në protestë”.

“Kjo mund të nënkuptojë kërcënime dhe dhunë fizike ndaj tyre dhe familjarëve, largime nga puna si dhe dëmtim të pronave të atyre personave”, shkroi Sveçla në llogarinë e tij në Facebook.

Ministri tutje u shpreh se Qeveria e Republikës së Kosovës dhe të gjitha institucionet e sigurisë qëndrojnë të angazhuara e përkushtuara maksimalisht në shërbim të të gjithë qytetarëve të vendit pa dallim.

“Dënojmë ashpër veprimet e vazhdueshme të Listës Serbe dhe bandave kriminale të drejtuara nga ta, me porosi të Beogradit. Këto taktika duhet të ndalen që qytetarët serbë të Kosovës të jetojnë pa presione e kërcënime”, përfundoi ai.

01/06/2023 14:02-Kurti: Nuk pranojmë që kryetarët të ushtrojnë detyrat në zyra paralele

Kryeministri i Kosovës, Albin Kurti, nuk ka hequr dorë nga vendimi që kryetarët e komunave veriore të ushtrojnë detyrat në objektet komunale, pavarësisht situatës së krijuar në veri.

Kurti ka thënë se kryetarët e zgjedhur atje janë legal dhe mandatin duhet të ushtrojnë në bazë të kompetencave të tyre.

“Nuk duhet të ketë paralelizma në veri, nuk pranojmë që kryetarët të ushtrojnë detyrat në zyra paralele”, ka thënë ai para gazetarëve.

Ndërsa lidhur me raportet me ShBA-të, Kurti ka thënë se ato janë të shkëlqyeshme mirëpo ka raste kur dallojnë në qasje, e cila sipas tij nuk është thelbësore./kp/

01/06/2023 13:58-Sulmohen dy shqiptarë në veri të Mitrovicës

Dy shqiptarë janë sulmuar sot nga një grup serbësh në veri të Mitrovicës.

Protestuesit serbë po kundërshtojnë hyrjen e kryetarëve shqiptarë në ndërtesat komunale.

Situata në këto komuna është tensionuar të premten e 26 majit kur kryetarët e betuar janë detyruar të hyjnë në zyrat e tyre të punës nën asistencën e Policisë së Kosovës.Të hënën (29) protestuesit me maska e edhe ata pa maska kanë ushtruar dhunë ndaj pjesëtarëve të KFOR-it, Policisë së Kosovës dhe gazetarëve.

Ata kanë hedhur gjësende të ndryshme në drejtim të paqeruajtësve, derisa kanë dëmtuar vetura të mediave, duke e djegur tërësisht veturën e një televizioni./KP/

01/06/2023 13:47-Shpërndahen të qetë qytetarët që ishin mbledhur tek Ura e Ibrit

Qytetarët që ishin mbledhur për të protestuar në jug të Mitrovicës, konkretisht tek Ura e Ibrit, janë shpërndarë të qetë.

Protesta e tyre ka zgjatur vetëm pak minuta. Ata ishin mbledhur pas thirrjeve që të mërkurën ishin bërë nga profile të ndryshme në rrjete sociale.

Policia e Kosovës dhe ministri i Brendshëm, Xhelal Sveçla, kanë bërë thirrje që kjo protestë të bojkotohet.

01/06/2023 13:35-Pjesëtar me simbole të grupit Wagner janë parë në protestën e sotme në Zubin Potok

Në tri komunat në veri të Kosovës, edhe sot janë duke vazhduar protestat e serbëve lokalë kundër zgjedhjes së kryetarëve të rinj nga radhët e shqiptarëve në këto komuna.

Ashtu si në ditët e para në mesin e protestuesve ka pasur edhe grupe kriminale serbe, të cilët kanë sulmuar gazetarët, policët e Kosovës dhe ushtarët e KFOR-it.

Në mesin e këtyre personave ka pasur edhe njerëz të maskuar dhe pjesëtarë të cilët kanë pasur të veshur bluza me simbolin “Z” që e karakterizon grupin mercenar rus Wagner.

Pamje që tregojnë dhunën e grupeve kriminale serbe ndaj ushtarëve të KFOR-it.

Edhe gjatë ditës së sotme në Zubin Potok, janë vërejtur në mesin e protestuesve edhe pjesëtarë të këtyre grupeve kriminale. Kjo është dëshmuar në një fotografi që ka siguruar Telegrafi nga vendi i ngjarjes ku po zhvillohet protesta.

Komandanti i KFOR-it, Angelo Michelle Ristuccia është pyetur pikërisht për mercenarët rus, pjesëtarët e Brigadës Wagner, për të cilët u tha se janë nisur për në Kosovë.

Komandanti i KFOR-it bëri të ditur se deri më tani nuk ka asnjë dëshmi për praninë e tyre në këtë zonë.

Ndryshe të hënën në veri, grupet e tilla kriminale serbe sulmuan ushtarët e KFOR-it, ku për pasojë 30 prej tyre kanë mbetur të plagosur.

Cak i sulmeve të këtyre grupeve tash e pesë ditë janë edhe mediat e ndryshme të cilat po raportojnë për ngjarjet në veri të Kosovës

01/06/2023 13:04-​Abdixhiku takoi ambasadorin francez: Koordinimi me aleatët, i domosdoshëm

Kryetari i Lidhjes Demokratike të Kosovës, Lumir Abdixhiku, e ka pritur në takim ambasadorin e Francës në Kosovë, Olivier Guerot, me të cilin ka diskutuar për situatën aktuale në veri të vendit.

Abdixhiku e ka shprehur qëndrimin e LDK-së duke theksuar domosdoshmërinë e koordinimit të veprimeve me aleatët ndërkombëtar.

“Abdixhiku e njoftoi ambasadorin Guérot për qëndrimet e LDK-së karshi kësaj situate, duke theksuar domosdoshmërinë e koordinimit të veprimeve të institucioneve të Republikës së Kosovës me aleatët tanë si parakusht i stabilitetit afatgjatë”, ka njoftuar LDK.

Kreu i LDK-së gjithashtu ka theksuar nevojën e mbështetjes ndaj institucioneve të rendit në Kosovë, me qëllim të garantimit të sigurisë së institucioneve dhe të qytetarëve përballë rrezikut të dhunës së krijuar nga bandat kriminale në veri të vendit

01/06/2023 12:55-Vuçiq konfirmon se do të takohet me Macron dhe Scholz

Presidenti i Serbisë, Aleksandër Vuçiq ka konfirmuar se gjatë ditës së sotme do të takohet me presidentin e Francës, Emmanuel Macron dhe kancelarin gjerman, Olaf Scholz. Vuçiq derisa theksoi se nuk e di se kush do të vijë nga Kosova, u shpreh sdo të përpiqen të bëjnë më të mirën për t’i kthyer gjërat në normalitet.

Ai ka folur edhe për deeskalimin e situatës në veri të Kosovës, për çka ka thënë se kjo varet nga të dy palët.

Këto komente presidenti serb, Aleksandër Vuçiq i bëri në margjinat e Samit të dytë të Komunitetit Politik Evropian në Moldavi.

“Nuk e di kush do të vijë nga Prishtina, por pa dyshim që do të takoj Scholz-in dhe Macron-in dhe ky do të jetë një diskutim shumë i rëndësishëm për ne”, u shpreh Vuçiq.

Edhe pse vet i shtyu serbët që të mos jenë pjesë e zgjedhjeve të jashtëzakonshme për komunat veriore, Vuçiq përsëriti se me 3.4% nuk janë zgjedhje legjitime.

Ai tha se Kosova nuk është dahsur të dërgoj Njësinë Speciale në komunat në veri të vendit, derisa shpifi se gjoja “maltreton dhe persekuton qytetarët”, kur dihet se Policia e Kosovës po qëndron kryesosht brenda objekteve komunale dhe është KFOR-i jashtë.

01/06/2023 12:43-Kovaçevski: Paqja në Kosovë është paqe për të gjithë Ballkanin Perëndimor

Kryeministri Dimitar Kovaçevski në Samitin e Komunitetit Politik Evropian në Moldavi, ka folur për situatën në veri të Kosovës. Ai tha se paqja në Kosovë nënkupton paqe për të gjithë rajonin.

Kryeministri i RMV-së bëri thirrje që Kosova dhe Serbia t’u përmbahen marrëveshjeve tashmë të arritura.

“Paqja në Kosovë është gjithashtu paqe për Ballkanin Perëndimor. Mendoj se koha e konflikteve është shumë larg pas nesh, kështu që zbatimi i marrëveshjeve të bëra tashmë mes Kosovës dhe Serbisë si dhe aneksi për planin e zbatimit duhet të jenë imperativ për të gjithë politikanët nga të dy vendet”.

“Ne bëjmë thirrje për de-përshkallëzim të situatës dhe për vazhdimin e komunikimit mes dy palëve me ndihmën e SHBA-ve dhe BE-së”, tha Kovaçevski.

01/06/2023 12:42-Rama takon Vuçiqin: Konflikti në veri duhet të zgjidhet krah për krah me botën demokratike

Kryeministri i Shqipërisë, Edi Rama ka takuar sot Presidenti serb Aleksandar Vuçiq gjatë organizimit të takimit të dytë të Komitetit Politik Evropian që po zhvillohet në Moldavi.

Të pranishëm ishin edhe Presidentja e Komisionit Evropian, Ursula von der Leyen dhe lider të tjerë evropian.

“Rajoni duhet të hyjë në një marrëdhënie të re me BE-në, ndërkohë që konflikti në Veriun e Kosovës duhet të zgjidhet krah për krah me botën demokratike, duke u dhënë fund absurdit kërcënues e duke finalizuar marrëveshjen e normalizimit dhe njohjes së ndërsjellë mes Kosovës e Serbisë”, Rama tha në një postim në Facebook.

Më herët, Vuçiç shkroi pas takimit me Ramën se duhet bërë çdo përpjekje për të ruajtur paqen që kanë fituar me mund dhe gjatë takimit kishin biseduar për gjetjen e një zgjidhje sa i takon situatës aktuale në Veri.

“Ne në rajon e dimë më së miri se sa e rëndësishme është që së bashku të bëjmë çdo përpjekje për të ruajtur paqen dhe stabilitetin e fituar me mund. Biseduam për ngjarjet aktuale dhe hapat e mëtejshëm që do të kontribuonin në gjetjen e një zgjidhjeje për situatën aktuale, të vështirë dhe të rëndë, me shpresën se arsyeja do të mbizotërojë, në të mirë të të gjithëve”, tha ai në Instagram.

01/06/2023 12:39-Numër më i vogël i protestuesve në Zveçan

Numri i protestuesve në Zveçan sot është më i vogël, krahasuar me ditët e tjera.

Situata është e qetë, shkruan KosovaPress

Në tri komunat veriore të vendit, Zveçan, Leposaviq dhe Zubin Potok, serbët po protestojnë edhe sot.

Dje, në Zveçan situata herë pas here është tensionuar, ndërsa nuk kanë munguar sulmet ndaj ekipeve të gazetarëve.

Protestuesit serbë po kundërshtojnë hyrjen e kryetarëve shqiptarë në ndërtesat komunale.

Situata në këto komuna është tensionuar të premten e 26 majit kur kryetarët e betuar janë detyruar të hyjnë në zyrat e tyre të punës nën asistencën e Policisë së Kosovës.

01/06/2023 12:22-Protestuesit në jug këndojnë “Jo nuk ndahet Mitrovica”

Qytetarët që janë mbledhur në jug të Mitrovicës për të protestuar kanë nisur duke kënduar “jo nuk ndahet Mitrovica”.

Ata kanë vazhduar me brohoritma “Mitrovica, Mitrovica”, “O sa mirë me qenë shqiptar” .

Qytetarët po vazhdojnë duke kënduar këngë të tjera si “për Kosovë jetën dojm me dhanë”.

Nuk kanë munguar as thirrjet “UÇK, UÇK”.

Policia ndërkaq ka krijuar një kordon para protestuesve.

01/06/2023 12:15-Ndonëse u bë thirrje që për mospjesëmarrje, qytetarët mblidhen tek Ura e Ibrit

Qytetarë të shumtë janë mbledhur në afërsi të Urës së Ibirit në Mitrovicë, për të marrë pjesë në protestën e cila u thirr në rrjetet sociale nga profile dhe persona deri tash të pa njohur.

Ndonëse Policia e Kosovës dhe ministri i Brendshëm, Xhelal Sveçla u bëri thirrje qytetarëve që të shpërfillin këto thirrje, një gjë e tillë nuk ndodhi.

Në vendin ku janë grumbulluar qytetarët, kanë dalë edhe pjesëtarë të Policisë së Kosovës. Shumë prej qytetarëve shihem me flamujt “Autochthonous” dhe atë kombëtar.

Njëri prej qytetarëve ka thënë se me ardh puna edhe pa bukë edhe pa ujë rrimë, dhe ne do të shkojmë në mënyrë paqësore.

Disa të tjerë janë dëgjuar duke thënë se “nuk ka kthim mbrapa”.

Autoritetet e sigurisë po dyshojnë se kjo protestë është “organizuar” nga persona të dyshuar jashtë Kosovës.

01/06/2023 11:57-Replikat ndaj deklaratës së Blinken, deputeti i LDK-së: Zoti na ruajt, këta nuk dinë çfarë bëjnë

Deputeti i LDK-së, Avdullah Hoti ka thënë se pushtetarët në Kosovës nuk dinë çfarë bëjnë, duke shtuar se ata në sinkron po replikojnë me sekretarin amerikan Antony Blinken.

Ai ka shtuar se ushtarët amerikan janë çdo ditë në veri, si pjesë e KFOR-it, duke e siguruar paqen.

“Para një kohe, vetë kreu i qeverisë kishte deklaruar se Ambasadori Amerikan e kishte informuar për gjëra lidhur me zhvillimet në veri që ai nuk i kishte ditur, edhe pse AKI-ja është në teren dhe e ka për detyrë të kuptojë se çfarë ndodh e çfarë pritet.

Ndërsa, pushtetarët e Kosovës në sinkron replikojnë me Sekretarin Blinken se ai është naiv e nuk është i informuar për kontekstin politik në veri. Zoti na ruajtë, se këta nuk dinë çfarë bëjnë”, ka shkruar Hoti.

Ndryshe LDK pëmes një komunikate ka thënë se sulmet e bandave kriminale të drejtuara ndaj Policisë së Kosovës, gazetarëve raportues e ushtarëve paqeruajtës të KFOR-it tregojnë qartazi tendencat destabilizuese të Serbisë ndaj Republikës së Kosovës, institucioneve tona e vet trupave të NATO-s me mision në Kosovë.

01/06/2023 11:40-Gjermania dhe Franca ndërmjetësojnë në krizën e Kosovës

Kancelari Scholz e presidenti Macron duan të ndërmjetësojnë në konfliktin e ashpërsuar ditët e fundit në Kosovë. Në kuadër të samitit të Komunitetit Politik Europian ata takohen me presidenten Osmani e presidentin Vuçiq.

Zëdhënësi i qeverisë gjermane, Steffen Hebelstreit bëri të ditur në Berlin se në kuadër të samitit të dytë të Komunitetit Politik Europian, që zhvillohet të enjten në kryeqytetin e Moldavisë, Kishinau, kancelari gjerman, Olaf Scholz do të zhvillojë bisedime së bashku me presidentin francez, Macron me presidenten e Kosovës, Vjosa Osmani dhe presidentin Vuçiq për gjendjen aktuale në veriun e Kosovës.

Scholz dhe Macron zhvillojnë bisedime edhe me presidentin Vuçiq, i cili para samitit në Kishinau ka thënë se hapi i parë për uljen e tensioneve do të ishte tërheqja e “gjoja kryetarëve” të komunave nga veriu. Ai i bëri thirrje autoriteteve të Kosovës të tërheqin kryetarët e bashkive. Ky hap do të ishte hapi më i fuqishëm, ka kërkuar Vuçiq.

Presidenti francez, Emmanuel Macron në kuadër të takimit në Kishinau e ka quajtur zhvillimin e zgjedhjeve lokale në veri një gabim. Macron ka thënë, se ka një përgjegjësi të qartë të autoriteteve kosovare për situatën aktuale.

Ndryshe, presidentja Vjosa Osmani, deklaroi se shtetet aleate duhet të ndihmojnë në ndaljen e veprimeve destabilizuese të Serbisë në veri, derisa shtoi se duhet të kërkohet edhe zbatimi i marrëveshjeve të dakorduara në Bruksel.

Ajo, në Samitin e liderëve evropianë në Moldavi, deklaroi se është e rëndësishme të takohet me liderët evropianë për t’iu shpjeguar se çka po ndodh aktualisht në veri. Osmani tha se nuk e ka në plan që të takohet me presidentin e Serbisë, Aleksandar Vuçiq. /DW/

01/06/2023 11:28-Kryeministri i Kroacisë flet për situatën në veri, tregon se si e sheh qëndrimin e Kosovës në raport me Serbinë

Kryeministri i Kroacisë, Andrej Plenkoviq, gjatë një përgjigjeje në një pyetje rreth zhvillimeve të fundit në Kosovë ka thënë fillimisht se dëshirojnë të shohin stabilitet dhe zgjidhje të shpejtë të situatës në veri të Kosovës, ku u plagosën disa pjesëtarë të KFOR-it.

“E dyta është se jemi të vetëdijshëm për situatën delikate. Mënyra se si unë e kuptova në disa aspekte qëndrimin e lidershipit të Kosovës në raport me Beogradin, apo me Serbinë në përgjithësi, do ta përmbledh në tri fjalë: kërkim falje për agresionin e Millosheviqit, njohje, dhe pastaj normalizim”, ka thënë Plenkoviq, përcjell Telegrafi.

Në të njëjtën kohë, ka shtuar ai, cilido lider politik në Serbi që do e njohë Kosovën, nuk do të ketë shumë perspektivë karriere në politikë atje andaj edhe kjo e bën zgjidhjen shumë të komplikuar.

Deklaratat e tij të fundit, kryeministri kroat i ka dhënë në Forumim “Globsec 2023” në Bratisllavë të Sllovakisë.

Dhe deklaratat e tij vijnë pasi protestuesit me maska e edhe ata pa maska kanë ushtruar dhunë ndaj pjesëtarëve të KFOR-it, Policisë së Kosovës dhe gazetarëve.

Ata kanë hedhur gjësende të ndryshme në drejtim të paqeruajtësve, derisa kanë dëmtuar vetura të mediave.

“Pra, ajo që duhet të bëjmë është të lehtësojmë bisedimet, të qetësojmë situatën menjëherë dhe të gjejmë zgjidhje se si pjesa veriore e Kosovës, ku serbët janë shumicë, të cilët bojkotuan zgjedhjet kohët e fundit, mund të marrin pjesë në procesin demokratik. Kjo është thelbësore, pa pjesëmarrje në procesin demokratik nuk do të dërgoni sinjale të ndërtimit të besimit dhe bashkëjetesës në një pjesë shumë të vogël të vendit”, ka thënë më tej kryeministri kroat.

01/06/2023 11:20-Arrestohen tre serbë në Zveçan, bashkë me disa persona të tjerë ndalonin veturat në rrugë

Tre serbë janë arrestuar të mërkurën në Zveçan, pasi në bashkëveprim me disa persona tjerë, në rrugë kanë ndaluar disa automjete.

Policia njofton se të njëjtit dyshohen për veprën penale “Prishje e rendit dhe qetësisë publike”.

“Zveçan 31.05.2023 – 00:30. Janë arrestuar tre të dyshuar meshkuj serbë, pasi që të njëjtit në bashkëveprim me disa persona tjerë, në rrugë kanë ndaluar disa automjete”, thuhet në raportin policor.

Tre të dyshuarit janë intervistuar dhe me vendim të prokurorit, janë liruar në procedurë të rregullt.

01/06/2023 11:14-Osmani: S’kam plan të takohem me Vuçiqin, aleatët të na ndihmojnë në ndaljen e veprimeve destabilizuese të Serbisë

Presidentja e Kosovës, Vjosa Osmani, e cila po merr pjesë në Samitin e liderëve evropianë në Moldavi, tha se nuk e ka në plan që të takohet me presidentin e Serbisë, Aleksandar Vuçiq.

Në një deklarim për media, Osmani deklaroi se dialogu mes Kosovës dhe Serbisë organizohet në Bruksel dhe i takon Bashkimit Evropian që të përcaktojë datën kur është e domosdoshme që të bëhet një takim i tillë.

Ajo po ashtu u shpreh se shtetet aleate duhet të ndihmojnë në ndaljen e veprimeve destabilizuese të Serbisë në veri, derisa shtoi se duhet të kërkohet edhe zbatimi i marrëveshjeve të dakorduara në Bruksel.

“Ne si rajon e në veçanti si Kosovë jemi vazhdimisht përball sfidës së ndikimeve hibride që Rusia dhe satelitët e saj janë duke tentuar që t’i shtyjnë përpara për ta destabilizuar Evropën. Serbia vazhdimisht ka shërbyer si satelit i Rusisë. Unë jam këtu për të kërkuar përkrahjen e partnerëve tanë për t’i luftuar këto tendenca si dhe të parandalohet ndikimi i këtyre tendencave dhe propagandës. Vuçiqi është i interesuar që përmes bandave kriminale të destabilizojë vendin, s’duhet të lejohet një gjë e tillë… Prandaj, koordinimi me aleatët tanë është shumë i rëndësishëm”.

Gjatë këtij samiti, presidentja tha se do të ketë takime me shumë liderë evropianë, teksa theksoi se është e rëndësishme të takohet me ta për t’iu shpjeguar se çka po ndodh aktualisht në veri.

“Përveç presidentit Macron dhe kancelarit Scholz, kam takime me pothuajse të gjithë liderët që marrin pjesë në këtë samit. Është me rëndësi që të kërkojmë përkrahjen e tyre për aplikimin e Kosovës në BE dhe ecjen përpara në Këshill të Evropës, por edhe të shpjegojmë në detaje se çka po ngjan në veri të Kosovës. Një numër i madh i liderëve kanë shprehur interesim për t’u takuar në mënyrë që të gjejmë një zgjidhje për shtensionimin e situatës. Po ashtu, do të kërkoj ndihmën e tyre që t’i luftojnë grupet kriminale në veri që po destabilizojnë vendin tonë”, shtoi Osmani.

“Është me rëndësi që nga Serbia të kërkohet t’i ndalë veprimet destabilizuese dhe bandat e saj kriminale. Këto janë grupe që janë në listën e zezë të SHBA-së dhe të Mbretërisë së Bashkuar. Ata po terrorizojnë edhe qytetarët serbë çdo ditë. Na duhet ndihma e aleatëve të jemi më të fokusuar në luftimin e grupeve, por urdhri ndaj tyre vjen nga Vuçiqi. Dihet mirë kush i nxit ato të përdorin dhunë në Kosovë, pra presioni duhet të jetë te Beogradi që ta ndalin dhunën… Kur ka dhunë, çdo zgjidhje përpara mund edhe të fokusohet në implementimin e Marrëveshjes së Brukselit”, përfundoi ajo.

01/06/2023 10:02-Borrell për situatën në veri: Dhuna nuk është rruga e duhur, autorët të vihen para drejtësisë

Përfaqësuesi i Lartë i Bashkimit Evropian, Josep Borrell, ka komentuar sërish situatën në veri të Kosovës.

Borrell tha të enjten nga Moldavia se kryesit e dhunës duhet të vihen para drejtësisë. Ai bëri thirrje të shmanget çfarëdo lloj përshkallëzimi.

“Ne duhet të insistojmë se dhuna nuk është rruga e duhur, ajo duhet të dënohet dhe kryesit e dhunës duhet të vihen para drejtësisë. Pra duhet shmanget çfarëdo lloj përshkallëzimi dhe lëvizje të pakoordinuara”, ka deklaruar Borrell.

Përfaqësuesi i BE-së, tha se shpreson që sot në margjinat e samitit të Komunitetit Politik Evropian, të zhvillojë një takim me presidentin e Serbisë, Aleksandar Vuçiq, pas atij që pati dje në Bratislavë me kryeministrin Albin Kurti.

01/06/2023 09:45-Stoltenberg: Dhuna ndaj KFOR-it e papranushme, NATO e gatshme të dërgojë edhe më shumë trupa në Kosovë

NATO-ja është e gatshme të dërgojë edhe më shumë trupa në Kosovë, për të qetësuar dhunën në veriun e këtij vendi, të banuar me shumicë serbe, tha të enjten shefi i aleancës, Jens Stoltenberg.

Ai shtoi se 700 trupat e para përforcuese, janë tashmë në rrugë për në Kosovë.

"NATO-ja do të mbetet vigjilente. Ne do të jemi atje për të siguruar një mjedis të sigurt, si dhe për të qetësuar dhe ulur tensionet", u tha Stoltenberg gazetarëve në margjina të një takimi të ministrave të jashtëm të NATO-s në Oslo, shkruan rel.

Tensionet në veri të Kosovës u rritën qysh më 26 maj, kur Policia e Kosovës ndihmoi kryetarët shqiptarë të komunave me shumicë serbe të hyjnë në zyrat komunale, përkundër rezistencës së banorëve lokalë.

NATO-ja vendosi ta rriste misionin e saj prej 4.000 trupash në Kosovë edhe me 700 trupa shtesë, pasi 30 paqeruajtës të saj u plagosën gjatë përleshjeve me protestuesit serbë në komunën e Zveçanit, më 29 maj.

Stoltenberg tha se dhuna kundër trupave të NATO-s është “krejtësisht e papranueshme”.

01/06/2023 08:59-Në Mal të Zi u mbajt një tubim “në mbështetje të serbëve në Kosovë”

Të mërkurën në Podgoricë të Malit të Zi është mbajtur një tubim, siç është thënë “në mbështetje të serbëve në Kosovë”. Sipas mediave në Mal të Zi, përcjell Telegrafi, të pranishmit, pasi u mblodhën para një kishe, nisën një shëtitje proteste.

Dhe pas një ore, të mbledhurit u shpërndanë të qetë.

Megjithatë, nuk dihet organizatori i takimit ku morën pjesë dhjetëra qytetarë, edhe pse njëri nga të grumbulluarit kishte thënë se ishte një “grup qytetarësh”.

Ndërkohë, raportohet se ftesa për tubim është dërguar përmes rrjeteve sociale dhe pjesëmarrës ishin edhe disa deputetë të partive më të vogla pro-serbe.

Siç bëjnë të ditur mediat në Mal të Zi, të mbledhurit mbanin flamuj serbë dhe kishin veshur bluza me fjalët “Kosova është Serbi”, “Rusi-Mali i Zi”, dhe kishte edhe disa me shkronjën “Z” dhe imazhin e Ratko Mlladiqit e Vladimir Putinit

01/06/2023 08:56-“The Guardian”: Britanikët të shqetësuar për ndëshkimet e SHBA-së dhe BE-së ndaj Kosovës

Mediumi prestigjioz britanik “The Guardian” i ka kushtuar një artikull situatës aktuale në Kosovë, konkretisht tensioneve në veri të vendit.

“The Guardian” duke u thirrur në burime të saja, shkruan se britanikët kanë shprehur shqetësimin e tyre që Shtetet e Bashkuara të Amerikës dhe Bashkimi Evropian, po e kërcënojnë një aleat me ndëshkim për shkak të mënyrës se si e ka trajtuar zhvillimet e fundit në veri.

Sipas tyre, SHBA dhe BE janë duke bërë gabim.

“Kryeministri i Kosovës, Albin Kurti, ka thënë se është i përgatitur të marrë në konsideratë zgjedhjet e parakohshme në veri të Kosovës me shumicë serbe, pasi disa burime britanike shprehën shqetësimin se SHBA dhe BE po bëjnë një gabim duke kërcënuar aleatin e tyre me ndëshkim për shkak të trajtimit të përplasjeve të dhunshme nga ana e Kurtit”, shkruan mediumi britanik.

Ata i referohen një ish-ambasadori të Mbretërisë së Bashkuar që sipas “The Guardian” ka deklaruar se se i dërguari i BE-së në Kosovë duhet të qëndrojë mënjanë.

Kjo gazetë citon edhe kryetaren e Komisionit për Punë të jashtme të Mbretërisë së Bashkuar, Alicia Kearns e cila ka paralajmëruar SHBA-në kundër ndëshkimit joproporcional të Kurtit.

Tutje “The Guardian” shkruan se diplomatët britanikë kanë frikë se përpjekjet e SHBA-së për të fajësuar Kurtin nuk shqyrtojnë shkakun rrënjësor të ngërçit, përfshirë kërkesën e BE-së që Kurti të pranojë një marrëveshje të arritur në 2013 duke i dhënë autonomi gjithëpërfshirëse një asociacioni të komunave serbe.

“BE-ja u përpoq ta impononte këtë si pjesë e një marrëveshjeje prej 11 pikash në bisedimet në Ohër në Maqedoninë e Veriut në mars, por asnjëra palë nuk e nënshkroi marrëveshjen. BE-ja argumentoi se marrëveshja, duke përfshirë klauzolat e vitit 2013 që siguronin njohjen e nënkuptuar de fakto të Kosovës nga Serbia, përmbushi kërkesën kryesore të Kosovës”, shkruan mediumi britanik.

01/06/2023 08:52-U bë thirrje për protestë në Mitrovicën jugore, policia apelon: Mos bini pre e profileve të dyshimta

Policia e Kosovës ka deklaruar të enjten se është në dijeni që, nëpër mediave të ndryshme sociale, nga persona dhe profile të ndryshme, janë duke qarkulluar postime me thirrje ndaj qytetarëve shqiptarë, për pjesëmarrje në gjoja protestë masovike në orën 12:00 në Jug të Mitrovicës dhe me synim kinse për marshim në veri të vendit.

Policia ka sqaruar se pas vlerësimeve nga institucionet e sigurisë, është vërtetuar se shumë nga këto profile janë të dyshimta dhe se postimet mund të jenë qëllimkëqija, në dëm të vet qytetarëve dhe interesave të Kosovës.

Prandaj, Policia ka ftuar qytetarët për qetësi dhe të mos bien pre e asnjë gjoja organizimi nga persona të panjohur, por të lënë institucionet e sigurisë, institucionet e Kosovës të trajtojnë situatën me profesionalizëm.

“Garantojmë qytetarët se institucionet e Kosovës në përgjithësi, e në veçanti Policia e Kosovës, janë plotësisht të aftë dhe të përkushtuar për të garantuar siguri, rend dhe qetësi për të gjithë qytetarët pa dallim”, thuhet në njoftimin për media.

Tutje, thuhet se policia e vlerëson lartë bashkëpunimin dhe mbështetjen e qytetarëve të Kosovës, në ruajtjen e paqes dhe stabilitetit në vend.

Postim i shpërndarë në rrjetin social TikTok

01/06/2023 08:38-Osmani takohet sot me Macron dhe Scholz

Presidentja e Kosovës, Vjosa Osmani ndodhet për vizitë në Moldavi, ku me ftesë të organizatorëve ajo po merr pjesë në samitin e Komunitetit Politik Evropian.

Në margjinat e këtij samiti, siç merr vesh Telegrafi,  Osmani sot do të zhvillojë një takim trilateral me presidentin e Francës, Emmanuel Macron dhe kancelarin e Gjermanisë, Olaf Scholz.

Burime të Telegrafit gjithashtu kanë theksuar se në takim nuk do të jetë i pranishëm presidenti serb, Aleksandar Vuçiq.

Gjatë pjesëmarrjes së saj në këtë samit, Osmani do të diskutojë thellimin e bashkëpunimit për shtyrjen përpara të aplikimit të Kosovës për BE, çështje që lidhen me situatën e sigurisë në rajon, si dhe tejkalimin e sfidave të përbashkëta.

Presidenti francez, Emmanuel Macron, dje ka bërë të ditur se bashkë me kancelarin gjerman, Olaf Scholz, do të bisedojnë më 1 qershor me presidenten e Kosovës, Vjosa Osmani, dhe presidentin serb, Aleksandar Vuçiq.

Macron i ka konfirmuar këto biseda në një fjalim të mbajtur në Konferencën GLOBSEC në Bratislavë.

01/06/2023 07:57-Nis grumbullimi i protestuesve në Zveçan, disa po nënshkruhen në listën “e punës”

Foto: REL

Qytetarë në Zveçan kanë nisur të grumbullohen që nga orët e para të mëngjesit, por në numër më të vogël se dje.

Punonjësit e Autoritetit të Përkohshëm të Komunës së Zveçanit, që funksionon nën sistemin e Serbisë, janë duke u regjistruar në listën e të punësuarve që është vendosur në një tavolinë, si dëshmi “që vijnë në punë”, raporton Radio Evropa e Lirë.

Forcat e KFOR-it qysh mbrëmë janë të dislokuara në të gjithë Zveçanin.

01/06/2023 07:49-Situata në Kosovë temë diskutimi mes liderëve evropianë në Moldavi, prezentë edhe Osmani

Presidentja e Kosovës, Vjosa Osmani, ndodhet në Kishinau të Moldavisë, ku sot zhvillon punimet Komuniteti Politik Evropian.

Është paralajmëruar se udhëheqësit e 27 vendeve të Bashkimit Evropian dhe të 20 vendeve të tjera do të diskutojn sot në Kishinau për një varg çështjesh, mes tyre edhe tensionet në veri të Kosovës.

Osmani i është bashkuar 46 krerëve të tjerë të shteteve të kontinentit evropian, si dhe krerëve të institucioneve të BE-së, me qëllim të nxitjes së dialogut politik dhe forcimit të bashkëpunimit për t’i adresuar çështjet më urgjente të sigurisë dhe stabilitetit në Evropë.

Shefi i politikës së jashtme të BE-së, Josep Borrell, pritet të takojë atje presidentin e Serbisë, Aleksandar Vuçiq.

Një ditë më herët, Borrell takoi në Bratisllavë kryeministrin e Kosovës, Albin Kurti.

Në një postim në Tëitter pas takimit, Borrell tha se situata në veri të Kosovës është “e rrezikshme dhe e paqëndrueshme”. /Telegrafi/

01/06/2023 07:38-Komandanti i KFOR-it: Në Zveçan kishte njerëz profesionist të cilët me qëllim e kanë nxitur turmën e banorëve serbë

Komandanti i KFOR-it, Angelo Michelle Ristuccia, ka komentuar zhvillimet e fundit në veri të Kosovës, ku ka theksuar se po të mos ndërhynte KFOR-i “tani do të ishim duke mbajtur zi për të vdekurit”.

Ristuccia shtoi se në Zveçan ka pasur njerëz që me qëllim kanë nxitur turmën e banorëve serbë.

“Në sheshin në Zveçan ka pasur profesionistë të protestës të cilët me dashje kanë nxitur turmën”, ka thënë ai për gazetën italiane “La Repubblica”.

Ai foli edhe për ushtarët e KFOR-it që pësuan lëndime gjatë konfrontimit me protestuesit e dhunshëm.

“Siç e dini, tridhjetë ushtarë të KFOR-it, 19 hungarezë dhe 11 italianë, pësuan një sulm frikacak gueril urban të hënën më 29 maj. Jam shumë pranë tyre dhe familjeve të tyre. Nëntë nga italianët janë në strukturën spitalore të bazës Camp Villaggio Italia, një është i shtruar në një strukturë në Prishtinë dhe një tjetër në Shkup. Mund të them se asnjëri prej tyre nuk është në rrezik për jetën, do të shërohen shpejt”, ka thënë ai.

Ai është pyetur edhe për mercenarët rus, pjesëtarët e Brigadës Wagner, për të cilët u tha se janë nisur për në Kosovë.

Komandanti i KFOR-it bëri të ditur se deri më tani nuk ka asnjë dëshmi për praninë e tyre në këtë zonë.