Vardari tronditi Strugën, merr tri pikë të arta për mbijetesë

Java e 20-të e Ligës së Parë të Maqedonisë së Veriut në futboll u hap me përballjen mes Strugës dhe Vardarit, e cila u zhvillua në stadiumin e qytetit në Strugë, njofton Telegrafi.

Një duel me rëndësi të madhe për të dyja skuadrat, ku Struga synonte të mbetej në garën për titull së bashku me Shkëndijën, Sileksin dhe Gostivarin, ndërsa Vardari kërkonte pikë jetike për t’i shpëtuar fundit të tabelës.

Pavarësisht se Struga u konsiderua favorite, Vardari befasoi duke marrë një fitore të vlefshme me rezultat 0-2. Pjesa e parë u karakterizua nga raste të shumta për të dy ekipet, por portat mbetën të paprekura deri në përfundim të 45 minutave të para.

Në pjesën e dytë, Vardari u tregua më konkret. Në minutën e 68-të, Zakariç zhbllokoi rezultatin, ndërsa në minutën e 82-të, Rogers Mato vulosi fitoren dhe siguroi tri pikë të rëndësishme për skuadrën shkupjane në luftën për mbijetesë.

Ndeshja u shoqërua edhe me tensione në tribuna. Grupi i tifozëve “Komiti” i Vardarit u përjashtua nga stadiumi pas thirrjeve me përmbajtje ofenduese në bazë etnike gjatë pjesës së parë, një veprim ky i ndërmarrë nga delegati i ndeshjes.

Ndërkohë, pjesa tjetër e ndeshjeve të javës së 20-të do të zhvillohet të dielën me fillim në ora 14:00. Shkëndija, kryesuesja e renditjes, do të presë në shtëpi Sileksin në një përballje direkte për kreun. Besa e Dobërdollit takohet me Gostivarin, Brera Strumica përballet me FC Shkupin, Tikveshi luan kundër Pelisterit, ndërsa Rabotniçki mas forcat me Voska Sportin. /Telegrafi/