Vajza e vogël qëndron mbi platformën e kondicionerit, kalimtarët e rastit ngjiten nëpër ballkone për ta shpëtuar (Video)

Një vajzë e vogël që kishte mbetur vetëm në apartament në një qytet në Kinë, kishte ngecur në platformën e kondicionerit në një lartësi prej 10 metra, por ajo u shpëtua në momentet më kritikë falë dy kalimtarëve të guximshëm.

Këta dy burra nuk kishin hezituar që të ngjiten nëpër ballkonet e apartamenteve për ta shpëtuar vogëlushen që rrezikohej të binte në tokë, transmeton Telegrafi.

Vajza e cila besohet të jetë e moshës dy apo tri vjeçe, kishte mbetur vetëm në apartament, por mjaftoi pak momente që ajo të kaplohet nga kureshtja dhe të dalë nga dritarja dhe të përfundon mbi platformën e kondicionerit.

Ngjarja ka ndodhur në qytetin Xinzhuang në pjesën lindore të Kinës, kur vajza e identifikuar si Xing Xing, ishte tërësisht e zhveshur në momentin që po qëndronte pothuajse e varur mbi platformën e kondicionerit.

Babai i vogëlushes Xing Xing ka deklaruar për mediat kineze se në ato momente ishte në fakt në shtëpi duke fjetur, kurse gruaja e tij në punë. /Telegrafi/