Unitedi me ofertë të parefuzueshme për Atleticon, ofron dy futbollistë për Saul Niguezin

Manchester United është duke kaluar nëpër një formë të mirë në Ligën Premier ku mbetet ndër kandidatët për titull të kampionit.

Por trajneri portugez i ‘Djajve të Kuq’, Jose Mourinho kërkon ta përforcojë edhe më shumë skuadrën në afatin kalimtar të janarit.

Ëndrra e madhe e Mourinhos është të nënshkruajë me mesfushorin spanjoll, Saul Niguez.

Talenti i Atletico Madrid ka shkëlqyer me ‘Los Colchoneros’ dhe është i pëlqyer nga shumë skuadra të mëdha evropiane.

22-vjeçari ka nënshkruar kontratë afatgjate me Atletico Madridin deri në qershor të vitit 2026 dhe largimi i tij nga klubi madrilen duket shumë i vështirë.

United është e gatshme të ofrojë dy futbollistët spanjollë, Juan Mata dhe Ander Herrera për të transferuar Saulin.

Saul ka një klauzolë prej 120 milionë eurove dhe sipas medieve angleze ‘Djajtë e Kuq’ janë të gatshëm të shtojnë edhe një pjesë të parave për të nënshkruar me Saul.

Në 11 ndeshjet e para këtë edicion me Atletico Madridin, Saul ka shënuar një gol dhe ka dhuruar një asistim.

Interesim për shërbimet e tij kanë shfaqur edhe Barcelona, Manchester City dhe Bayern Munich. /Telegrafi/