Unioni Evropian i Kontrolluesve Ajrorë për arrestimet në Shqipëri: Nuk vepron kështu një vend që synon integrimin në BE

Unioni Evropian i Kontrolluesve Ajrorë ka reaguar për arrestimin e tre kontrollorëve të Albcontrol. Në një deklaratë për mediat, ATCEUC shprehet se janë të tmerruar nga lajmet më të fundit në Shqipëri.

Në reagim thuhet se në një vend që aspiron të bëhet vend anëtar i Bashkimit Evropian është e papranueshme që punonjës jetësorë siç mund të jenë kontrolluesit e trafikut ajror, arrestohen.

Po ashtu, Unioni shprehet që është e papranueshme që të arrestohen punonjës vetëm se kanë kryer detyrat e tyre në “përputhje me rregulloret e BE-së apo për transmetimin e shqetësimeve të tyre publikisht kur punëdhënësi i tyre nuk pranoi të dëgjonte ose të angazhohej me ta, një punëdhënës që është përfundimisht përgjegjës për sigurinë e udhëtarëve që udhëtojnë nëpër qiellin shqiptar.”

Albcontrol, shton  ATCEUC ka ulur në mënyrë të njëanshme pagat e punonjësve të tyre deri në 70% pa u konsultuar dhe as biseduar me Sindikatat të cilat përfaqësojnë punonjësit.

“Albcontrol ka refuzuar çdo kërkesë nga Sindikatat për të negociuar një marrëveshje kolektive të përgjegjshme për të zgjidhur këtë krizë, duke vendosur punonjësit e saj nën një stres të jashtëzakonshëm shtesë në mes të një krize globale. Si mundet që Shqipëria ta shohë veten të denjë për një të ardhme të ndritur të re si anëtar i BE-së, kur është reagimi i tij ndaj punëtorëve që ndjekin të drejtat e tyre themelore për të vepruar në një mënyrë të kujton një të kaluar të errët staliniste që shpresonim të ketë qenë varrosur, dhe arreston ata që e kundërshtojnë?”

Unioni Evropian i Kontrolluesve Ajrorë i bën thirrje autoriteteve që të respektojnë jo vetëm rregulloret e BE, por edhe Konventën Evropiane për të Drejtat e Njeriut si dhe të lërë pas të gjitha mënyrat e vjetra e të përqafojnë  plotësisht të drejtat e punonjësve

“ATCEUC ka humbur të gjitha kontaktet me kolegët shqiptarë dhe është thellësisht i mërzitur nga ky zhvillim dhe i shqetësuar për mirëqenien e tyre, ne kërkojmë që autoritetet shqiptare të lirojnë menjëherë kolegët tanë.”