UBT ua mundëson 50 studentëve studimin në Morehead University

Përmes një marrëveshjeje të arritur mes rektorit Edmond Hajriz dhe përfaqësuesve të universitetit amerikan, Morehead State University, krijohet mundësia që në periudhën pesëvjeçare, 50 studentë të UBT-së të studiojnë në këtë universitet.

Marrëveshja përfshin periudhën 2016-2021, me mundësi vazhdimi. Ajo parasheh që për çdo vit në këtë universitet amerikan të studiojnë 10 studentë.

Për studentët e UBT-së që i vazhdojnë studimet për një vit akademik ose për një semestër në Morehead University, do të ndahet një bursë prej 4000 dollarëve.

Edhe studentët e Morehead University do të kenë mundësi që një pjesë të studimeve t’i bëjnë në UBT.

Marrëveshja parasheh edhe rastet kur studentët e UBT-së duan që një cikël të studimeve ta përfundojnë në Morehead University. Atyre u jepet përparësi në regjistrim.

Pos shkëmbimit të studentëve, marrëveshja parasheh edhe zhvillim të përbashkët të shkollave verore, vizita të ndërsjella, me qëllim të zhvillimit akademik dhe profesional të stafit e të studenteve të institucioneve gjegjëse, si dhe dizajnimin e kurrikulave dhe programeve të reja të studimeve.

Duhet theksuar se UBT është i vetmi institucion i arsimit të lartë në Kosovë, i cili çdo vit pranon studentë ndërkombëtarë, të cilëve u ofron studime të plota në gjuhën angleze. /Telegrafi/