Twitter thotë se abonimi në Twitter Blue për Android do të jetë 11 dollarë në muaj

Twitter Inc tha të mërkurën se do ta bënte abonimin në Twitter Blue për Android me 11 dollarë në muaj – njësoj si për abonentët iOS – derisa ofron një plan vjetor më të lirë për përdoruesit e uebit në krahasim me tarifat mujore.

Shenja blu – më parë falas për llogaritë e verifikuara të politikanëve, personaliteteve të famshme, gazetarëve dhe figurave të tjera publike – tani do të jetë e hapur për këdo që është i gatshëm të paguajë, transmeton Telegrafi.

Shërbimi u lansua vitin e kaluar për ta ndihmuar Twitterin të rrisë të ardhurat derisa pronari i kompanisë Elon Musk lufton për të mbajtur reklamuesit.

Përdoruesit e Android të Google do të jenë në gjendje të blejnë abonimin mujor të Twitter Blue për 11 dollarë, të njëjtin çmim si për përdoruesit e iOS të Apple, tha Twitter në faqen e tij të internetit.

Çmimi më i lartë për përdoruesit e Android ka të ngjarë të kompensojë tarifat e ngarkuara nga Google Play Store i Android, si App Store i Apple.

Plani vjetor për abonim në Blue, i disponueshëm vetëm në ueb, kishte një çmim prej 84 dollarë, një zbritje ndaj çmimit të abonimit mujor në ueb prej 8 dollarësh.

Twitter nuk iu përgjigj një kërkese për koment mbi strategjinë e tij të çmimeve Android.

Zbritja për përdoruesit e uebit do të jetë e disponueshme në vende duke përfshirë Shtetet e Bashkuara, Kanadanë, Mbretërinë e Bashkuar, Japoninë, Zelandën e Re dhe Australinë, tha Twitter. /Telegrafi/