Turqia arreston të dyshuarin për vrasjen e presidentit të Haitit

Autoritetet turke kanë arrestuar një burrë që konsiderohet si i dyshuar në vrasjen në korrik të presidentit të Haitit, Jovenel Moïse, ka thënë ministri i jashtëm i Haitit, Claude Joseph.

I dyshuari, Samir Handal, një biznesmen, u arrestua në aeroportin e Stambollit herët të hënën, ku mbërriti tranzit nga SHBA-ja në Jordani, shkruajnë mediat e huaja, përcjell Telegrafi.

Arrestimi i tij u njoftua nga autoritetet në Haiti më vonë të hënën.

Moïse, një ish-biznesmen 53-vjeçar që mori detyrën në vitin 2017, u qëllua për vdekje në banesën e tij private dhe gruaja e tij u plagos në sulm.

Një grup mercenarësh kolumbianë dolën si të dyshuarit kryesorë edhe pse askush nuk është akuzuar apo dënuar në lidhje me rastin.

“Sapo pata një bisedë telefonike me ministrin turk, mikun tim Mevlüt Çavuşoğlu, për të falënderuar Turqinë për arrestimin e Samir Handal, një prej personave me interes të madh në hetimin e vrasjes së presidentit”, shkroi Joseph.

Ai nuk dha detaje të mëtejshme, duke përfshirë nëse Haiti do të kërkonte ekstradimin e tij.

Më shumë se 40 të dyshuar janë arrestuar deri më tani në lidhje me vrasjen e Moïse, duke përfshirë 18 ish-ushtarë kolumbianë dhe disa oficerë policie haitiane.

Vrasja e Moïse thelloi paqëndrueshmërinë politike në vend. Pas vrasjes, Haiti u godit nga një tërmet me magnitudë 7.2 në gusht që vrau më shumë se 2200 njerëz, një rritje e dhunës së lidhur me bandat dhe një mungesë e madhe karburanti. /Telegrafi/