Presidenti i SHBA-së, Donald Trump, e vuri departamentin e policisë metropolitane të Uashingtonit nën kontrollin federal sot dhe njoftoi se do të vendoste edhe Gardën Kombëtare në kryeqytetin e SHBA-së.
Trump pretendoi se "kryeqyteti ynë është pushtuar nga bandat e dhunshme dhe kriminelët e etur për gjak", transmeton Telegrafi.
Megjithatë, statistikat e policisë tregojnë se krimi i dhunshëm në Uashington DC ra me 35% në vitin 2024, dhe ra me 26% të tjera në gjashtë muajt e parë të vitit 2025.
Kryebashkiakja demokrate e Uashingtonit, Muriel Bowser, ka thënë më parë se qyteti "nuk po përjeton një rritje të krimit" dhe vuri në dukje se krimi i dhunshëm arriti nivelin më të ulët në më shumë se tre dekada vitin e kaluar.
Ndërkohë, Trump tha gjithashtu se autoritetet do të vazhdojnë të shkatërrojnë kampet e pastrehëve, të cilat ai i quajti "lagje të varfra".
Në njoftimin e tij, Trump tha se rreth 800 trupa të Gardës Kombëtare do të vendosen në Uashington.
Ky veprim vjen pasi Trump vendosi Gardën Kombëtare në Los Angeles gjatë protestave të mëdha në qershor. /Telegrafi/
