Tri ndeshje pa fitore për Bayernin, Kovac : Do të ketë ndëshkime për futbollistët

Bayern Munich është befasuar edhe në një ndeshje tjetër në Bundesliga.

Kampionët në fuqi kanë barazuar në shtëpi me skuadrën e rikthyer në elitë, Fortuna Dusseldorf.

Bavarezët ishin gjatë gjithë kohës në epërsi, 2-0 dhe 3-1, por në fund dy gola të mysafirëve bënë që ndeshja të përfundojë pa fitues.

Ky ishte takimi i tretë radhazi që Bayerni nuk fiton në Bundesliga, duke barazuar në dy prej tyre në Allianz Arena dhe duke pësuar në udhëtim te Dortmundi.

E më së shumti që rrezikon nga ky barazim është trajneri Niko Kovac, i cili ka folur pas ndeshjes.

“Nuk mund ta imagjinoni se si ndihem brenda meje. E kishim ndeshjen nën kontroll, më pas shkatërruam gjithçka. Jam gjithçka, por vetëm i lumtur nuk jam”.

Schluss in der #AllianzArena: #FCBF95 3-3. pic.twitter.com/wtDaBhwVHn

— FC Bayern München (@FCBayern) November 24, 2018

“Jam shumë i inatosur. Nuk mund ta imagjinoj këtë rezultat dhe nuk e meritojmë aspak atë pozicion në renditje”, deklaroi Kovac.

Trajneri kroat ka thënë se futbollistët e tij nuk dinë të mbrojnë dhe se këto gabime do të ndëshkohen.

“Nuk dimë të mbrojmë, duke lejuar kundërshtarin të realizojë 3 gola në portën tonë, në fushën tonë. Nuk ka rëndësi nëse luan në Champions apo ndaj një rivali modest. Këto gabime do të ndëshkohen. Këto gjëra nuk duhet t’i ndodhin një ekipi si Bayern”, deklaroi Kovac.

Aktualisht Bayerni ndodhet në pozitën e pestë në tabelë me 21 pikë të tubuara, nëntë më pak se lideri Borussia Dortmund. /Telegrafi/