Thunders, Clippers dhe Raptors shijonë fitoret e para të sezonit në NBA (Video)

Mbrëmë janë zhvilluar vetëm tre ndeshje në ligën më të fortë të basketbollit në botë.

Toronto Raprtors, Oklahoma City Thunders dhe Los Angeles Clippers kanë shijuar fitoret e para në këtë sezon të ri të NBA-s.

Raptors u treguan më efikas në takimin kundër Chicago Bulls duke triumfuar me një diferencë prej shtatë pikëve 107-100.

Kanadezët kishin në radhët e veta dy lojtarë që shënuan mbi njëzet pikë, përkatësisht Jonas Valanciunas realizoi 23 sosh dhe C.J. Miles një më pak.

Te ‘demat’ basketbollisti më efikas ishte Rubin Lopez me 18, i cili u ndihmua një pak nga Lauri Markkanen.

https://youtu.be/FEgJg5DqXcE?t=2

Clippersat fituan në derbin lokal ndaj Los Angeles Lakers me rezultat 108-92, ku vetëm në çerekun e fundit këta të fundit ishin më të mirë në parket.

Blake Griffin i Clippers realizoi “double-double” në saje të 29 pikëve dhe 13 kërcimeve gjersa në triumf dha kontribut edhe DeAndre Jordan me 14 pikë dhe Lou Williams me 12 sosh.

Te Lakers më i dalluari ishte Brook Lopez që shënoi njëzet pikë ndërsa dy më pak i shtoi edhe Jordan Clarkson.

https://youtu.be/0vJtH3frIVc?t=4

Në ndeshjen e fundit, Oklahoma për asnjë moment nuk e vuri në dyshim fitoren ndaj New York Knick duke e mposhtur me rezultat 105-84.

Megjithëse ylli i ekipit është Russell Westbrook, i cili shënoi 21 pikë, në këtë takim më efikasit ishin Carmelo Anthony me 22 sosh dhe Paul George me 28 pikë.

Por, Westbrook arriti të realizonte “triple-double” në saje edhe të dhjetë kërcimeve dhe asistimeve.

Te njujorkezët basketbollisti më i mirë në parket ishte Kristaps Porzinis, i cili njëkohësisht realizoi më së shumti pikë në takim, gjegjësisht arriti të bënte “double-double” në saje të 12 kërcimeve dhe 31 pikëve. /Telegrafi/

https://youtu.be/ZPOk3amd8TE?t=2