Thaçi-Orav: Të përmbushen detyrimet dhe standardet e vendosura nga Komisioni Evropian

Partia Demokratike Shqiptare në një komunikatë për Telegrafi Maqedoni ka njoftuar se sot në selinë qendrore të partisë ka pritur në takim lamtumirës Ambasadorin e BE-së, Aivo Orav.

‘Kryetari Thaçi fillimisht e falënderoi ambasadorin Orav për angazhimin e tij në zgjidhjen e krizës së thellë politike në Maqedoni, si dhe për angazhimet e BE-së lidhur me zhvillimet e proceseve demokratike në vend.

Kryetari Thaçi potencoi se një ndër prioritetet e PDSH-së është edhe organizimi i zgjedhjeve të lira dhe demokratike, me të vetmin qëllim eliminimin e parregullsive të deritanishme siç janë vjedhja e votave dhe falsifikimi i rezultateve, andaj në këtë drejtim kërkoi përkrahjen e faktorit ndërkombëtarë që të garantohen zgjedhje të lira, demokratike dhe të besueshme, kurdo qoftë që të mbahen ato.

Kryetari Thaçi gjithashtu theksoi se zgjidhja e çështjes së emrit dhe të marrëdhënieve ndëretnike, si dhe përmbushja e kushteve demokratike për të pasur zgjedhje të besueshme pa marr parasysh se kur do të mbahen ato, ngelin si çështje thelbësore dhe të domosdoshme për Partinë Demokratike Shqiptare.

Ambasadori Orav falënderoi Kryetarin Thaçi për rolin konstruktiv të PDSH-së si dhe për kontributin që e jep në këtë proces, duke shpresuar në vazhdim të dialogut të mirëfilltë dhe në përmbushjen e detyrimeve dhe standardeve të vendosura nga Komisioni Evropian’. /Telegrafi/