Tetë vende arabe zotohen të mbështesin “procesin e tranzicionit paqësor” në Siri

Diplomatët e lartë nga tetë vende të Ligës Arabe kanë rënë dakord në një takim në Jordani për të “mbështetur një proces tranzicioni paqësor” në Siri pas përmbysjes së pushtetit të presidentit Bashar al-Assad.

Ministrat e Jashtëm nga Jordania, Arabia Saudite, Iraku, Libani, Egjipti, Emiratet e Bashkuara Arabe, Bahreini dhe Katari lëshuan një deklaratë të përbashkët të shtunën pasi u takuan në portin jordanez Akaba të Detit të Kuq, shkruajnë mediat e huaja, përcjell Telegrafi.

Ata thanë se “të gjitha forcat politike dhe sociale” duhet të përfaqësohen në qeverinë e re siriane dhe paralajmëruan kundër “çdo diskriminimi etnik, sektar apo fetar” dhe bënë thirrje për “drejtësi dhe barazi për të gjithë qytetarët”.

Procesi politik në Siri duhet të mbështetet nga “Kombet e Bashkuara dhe Liga Arabe, në përputhje me parimet e Rezolutës 2254 të Këshillit të Sigurimit”, një rezolutë e vitit 2015 e cila përcaktoi një udhërrëfyes për një zgjidhje të negociuar, thuhet në deklaratë.

Diplomatët arabë morën pjesë gjithashtu në një takim të veçantë në Akaba, ku u përfshi edhe Sekretari i Shtetit të SHBA-së, Antony Blinken, i dërguari i posaçëm i OKB-së për Sirinë, Geir Pederson, dhe shefja e politikës së jashtme të BE-së, Kaja Kallas dhe ministri i Jashtëm turk Hakan Fidan.

Ai takim bëri thirrje gjithashtu për një qeveri gjithëpërfshirëse dhe përfaqësuese që respekton të drejtat e pakicave dhe nuk ofron “një bazë për grupet terroriste”, sipas Blinken, i cili foli në një konferencë shtypi.

Bisedimet vijnë pas rënies së al-Asadit pas një ofensive të rrufeshme nga grupi opozitar Hayat Tahrir al-Sham (HTS) javën e kaluar. /Telegrafi/