Terim mbeti i habitur që Kosova nuk e kishte aktivizuar yllin e saj: Po ti, pse nuk je në fushë?

Përfaqësuesja e Kosovës ka pësuar humbje të thellë 1-4 në shtëpi ndaj Turqisë.

Por pas kësaj ndeshje ka pasur shumë kritika në drejtim të shtabit teknik dhe Federatës së Futbollit të Kosovës.

Një gjë e pa thënë deri më tani, ishte një tjetër takim mes trajnerit turk Fatih Terim dhe futbollistit kosovar Herolind Shala.

Shala ka zhvilluar tri ndeshjet e fundit me Kosovën duke qenë lojtari kryesor në mesfushë, por çuditërisht në një ndeshje tejet të rëndësishme si ajo ndaj Turqisë ai nuk u aktivizua në fushë.

Por vendimi për ta lënë në bankën rezervë Herolind Shalën, si duket e ka befasuar edhe ‘Imperatorin’, Fatih Terim.

Kur dy Përfaqësueset po bëheshin gati të fillonin pjesën e dytë, Shala u afrua ta përshëndeste Terimin i cili e kishte përgëzuar në Antalya për lojën e treguar.

Telegrafi ua sjellë ekskluzivisht tifozëve kosovarë bisedën e shkurtër që patën dyshja Shala – Terim, ku ky i fundit mbeti i habitur që ylli kosovar po qëndronte në bankë.

“Po ti pse nuk je në fushë? Prisja të shoh nga minuta e parë pasi ishe lojtari kryesor në Antalya në ndeshjen e nëntorit. Ndoshta kjo gjë është më mirë për ne”, i tha trajneri turk Herolind Shalës duke qeshur.

“Është vendim i trajnerit dhe duhet ta respektojë. Çfarë të bëjë tjetër. Ndoshta më mirë për ju se do të ju shkaktoja probleme më të mëdha se në Antalya”, ishte përgjigja e Shalës në drejtim të trajnerit turk gjithashtu duke qeshur.

Pas përshëndetjes me njëri tjetrin, të dy i kanë uruar suksese.

Lexo po ashtu Terim u impresionua nga futbollisti kosovar, e takoi pas ndeshjes dhe ia tha disa fjalë (Foto)

Terim e pyeti në fund Shalën edhe për largimin e tij nga Kasimpasa, ndërsa drenicasi ia ktheu se shpreson që një ditë të jetë nën urdhrat e ‘Imperatorit’.

Kujtojmë që Shala vitin e fundit ka qenë i huazuar në skuadrën turke Kasimpasa nga Sparta e Pragës.

25-vjeçari si duket është futbollisti shqiptar më i pëlqyer nga Terim dhe ndoshta në një të ardhme trajneri legjendar turk do të tentojë ta transferojë Shalën në rast se do të marrë drejtojë ndonjë skuadër.

Pas ndeshjes, ish-anëtari i Kombëtares shqiptare ka bërë një postim tejet emocionues në faqen e tij zyrtare duke prekur mijëra tifozët të Përfaqësueses sonë.

“Na falni që po ju dëshpërojmë”, shkroi Shala, ndërsa në foton e tij komentuan shumë tifozë kosovarë duke e përkrahur atë.

Lënien në bankë të Shalës nuk e kanë pritur mirë as tifozët kosovarë të cilët e kanë vlerësuar tej mase lojën e Herolindit në ndeshjet e fundit, ku në takimin ndaj Islandës ishte asistues i golit të vetëm të shënuar nga Atdhe Nuhiu. /Telegrafi/