Tenistja Blearta Ukëhaxhaj do jetë bartëse e flamurit të Kosovës në ceremoninë hapëse të EYOF “Gyor 2017” në Hungari (Foto)

Ceremonia solemne e hapjes së Festivalit Olimpik Evropian për të rinj (EYOF), “Gyor 2017”, do të bëhet sonte (e diel) në stadiumin “Eto Park” të Gyorit në Hungari, duke filluar prej orës 20:30.

Kosova do të defilojë përkrahë 49 shteteve tjera të Evropës.

Bartëse e flamurit tone do të jetë tenistja Blearta Ukëhaxhaj, e përzgjedhur ditë më parë nga Bordi Ekzekutivi Komitetit Olimpik të Kosovës, transmeton KP.

Ajo do t’i prijë ekspeditës 20 anëtarëshe të ekipit olimpik të Kosovës. 15-vjeçarja, Ukëhaxhaj, është tenistja më e mirë në Kosovë në dy vitet e fundit për grupmoshën e saj, derisa vitin e kaluar arriti të renditet e 288-ta në renditjen botërore, arritja më e madhe për një teniste shqiptare.

“Është ndjenjë shumë e veçantë dhe gëzohem që ma kanë besuar këtë mundësi. Besoj se nuk do t’i zhgënjej as në gara”, u shpreh tenistja nga Deçani.

Në ceremoninë mbyllëse që mbahet më 29 korrik, bartës i flamurit do të jetë njëri nga dy xhudistët, Laura Fazliu ose Shpat Zekaj. Të dy i bashkohen ekipit olimpik pas disa ditësh, pasi ndodhen në përgatitje shtesë me trajnerin e njohur, Driton Kuka.