Të shtëna me armë në një shkollë në Bosnjë dhe Hercegovinë, një mësues i plagosur

Një mësues në një shkollë fillore në Lukavac të Bosnjë dhe Hercegovinës ka mbetur i plagosur rëndë nga të shtënat që kanë ndodhur mëngjesin e sotëm.

Siç raportojnë mediat në BeH, përcjell Telegrafi, të shtënat janë kryer nga një nxënës, i cili është vënë nën kontroll nga policia.

Gjegjësisht, mëngjesin e sotëm rreth orës nëntë në këtë shkollë fillore kanë ndodhur të shtëna me armë zjarri nga të cilat sipas informacioneve fillestare është lënduar rëndë një punonjës.

Jozyrtarisht bëhet fjalë për një mësues të gjuhës angleze i cili është shtruar në spital për shkak të një plage me armë zjarri në qafë dhe aktualisht është duke u zhvilluar një operacion.

Një informatë e tillë është konfirmuar edhe nga kryetari i komunës së Lukavacit, Edin Deliq, duke treguar se të shtënat janë kryer nga një nxënës.

Siç ka thënë Deliq, ai është vënë nën kontrollin e policisë dhe është dërguar menjëherë në komisariat.

Gjithashtu është gjetur edhe arma me të cilën ka kryer sulmin.

Jozyrtarisht mësohet se bëhet fjalë për një nxënës i cili është transferuar nga një shkollë fillore në tjetrën për sjellje të keqe. /Telegrafi/