A do të pasojnë sanksione të reja për Maqedoninë!?

Ditëve të fundit nga Brukseli, konfirmuan se kanë bllokuar 27 milionë euro që paraprakisht ishin planifikuar për Maqedoni si ndihmë para anëtarësimi, për shkak të mos përgatitjes dhe papjekurisë në planifikimin për shfrytëzimin e të hollave në sektorët kyçe, gjegjësisht për shkak të mosplotësimit të reformave të kërkuara në Maqedoni, transmeton Telegrafi Maqedoni.

Sipas disa ekspertëve dhe njohësve të situatës, këto janë sanksionet e para evropiane kundër Maqedonisë. Në pyetjen e TV21 nëse do të pasojnë edhe sanksione të tjera, Emil Kirjas, sekretari i përgjithshëm i “Liberal International” me seli në Londër, ka deklaruar me sa vijon:

“Nëse nuk ka ndryshime, patjetër që do të pasojnë sanksione. Kjo tanimë është publikuar si politikë. Kur në një sistem të caktuar nuk ka drejtësi, kur njerëzit në mënyrë masive, shohim se si vjedhin diçka, sepse kështu ua mundëson pushteti si sistem, atëherë ky sistem padyshim se do të jetë i dështuar. Greqia nuk u mundua ta mbrojë regjimin këtu, sepse po mundohet ta mbrojë politikën e saj, duke pritur që të shpërbëhet Maqedonia”./Telegrafi/