Të paktën 14 viktima për shkak të stuhisë Eunice që ka përshkuar një pjesë të Evropës

Të paktën 14 persona kanë humbur jetën për shkak të stuhisë Eunice që ka përshkuar një pjesë të Evropës.

Sipas BBC, përcjell Telegrafi, vdekjet u raportuan në Belgjikë, Holandë, Gjermani, Poloni, Republikën Irlandeze dhe Mbretërinë e Bashkuar; nga ku erërat e forta prenë pemët dhe fluturuan mbeturinat.

Miliona shtëpi dhe biznese humbën energjinë përreth Evropës dhe rrjetet e transportit mbetën në rrëmujë.

Roja bregdetare holandeze tha se po përpiqej të gjente 26 kontejnerë bosh transporti të humbur në Detin e Veriut.

Erërat prej pothuajse 200 kilometër në orë u regjistruan të premten.

Disa nga ata që vdiqën u goditën nga rrëzimi i pemëve: katër në Holandë, dy në Poloni pasi pemët ranë mbi makinat e tyre dhe një burrë rreth të 60-ave vdiq në Qarkun Wexford, Republika e Irlandës.

Dy të tjerë vdiqën në Gjermani dhe tre persona humbën jetën rrugëve të Anglisë.

Dy persona kanë vdekur në Belgjikë, duke përfshirë një burrë të goditur në kokë nga një panel diellor që ra nga një ndërtesë në Ghent. /Telegrafi/