Të martën “Dukagjini” promovon librin “Kape Lepurin” të Lana Bastašić-it

Për të gjithë ju dashamirë të librit, shtëpia botuese “Dukagjini” ka njoftuar se më 26 nëntor, ditën e martë, në orën 18:00, në librarinë “Dukagjini” (te sheshi “Nënë Tereza”) do të bëhet promovimi i librit “Kape lepurin” nga Lana Bastašić.

Jua rikujtojmë se “Dukagjini” është shtëpia e parë botuese nga Kosova që është bërë pjesë e projektit kulturor “Evropa Kreative”, me mbështetjen e së cilës sjell edhe librin “Kape Lepurin”, i cili vjen në kuadër të kolanës “Effugium”.

Për të diskutuar rreth librit, në panel do të jenë të pranishëm:

– Shkëlzen Maliqi – përkthyes i librit dhe

– Shpëtim Selmani – shkrimtar dhe aktor.

– Promovimi do ta moderojë Jeta Zymberi nga shtëpia botuese “Dukagjini”.

Romani “Kape lepurin” vë përballë të kaluarën dhe të tashmen përmes një historie tejet emocionuese për luftën, vdekjen e miqësinë femërore e krahas tyre edhe për identitetin dhe marrëdhëniet femërore e pjekurinë feministe në një shoqëri patriarkale e konservatore të periudhës së viteve ’90. 

Nis si një udhëtim rrugor në Bosnjën e pasluftës, i dy grave të reja, i dy shoqeve, Lejlës e Sarës, e bëhet udhëtim i gjatë nëpër të kaluarën, me synim gjetjen e Arminit, vëllait të Lejlës, i cili qe zhdukur në fund të luftës së Bosnjës, e që vetëm ato ishin të bindura se ai ende ishte gjallë.

Rreth autores:

Lana Bastašić është shkrimtare, romanciere dhe përkthyese boshnjake. Romani debutues i Bastašić-it, “Kape lepurin”, u botua në Beograd në vitin 2018, dhe më pas u ribotua në Sarajevë. Libri fitoi Çmimin e BE-së për Letërsinë në vitin 2020 dhe u përfshi në listën e ngushtë për Çmimin NIN. Ndërsa “Dukagjini” e sjell “Kape lepurin” në gjuhën shqipe, në kuadër të kolonës “Effugium”.

Promovimi është një mundësi e mirë për takim e diskutim më të afërt rreth librit!