A do të funksionalizohen hallkat elektronike për të dyshuarit këtë vit?

Ndonëse ministrja e Drejtësisë insiston se brenda fushatës për parandalimin e dhunës në familje, do të nis të funksionalizuara sistemi i mbikëqyrjes elektronike të personave të dyshuar për vepra penale, këtë aktivitet nuk e ka paraparë në agjendë. Shoqëria civile hedh kritika për këtë, duke thënë se nuk duhet pritur fushata për të zbatuar një ligj që është në fuqi tash e 9 vite.

Që nga viti 2015, Ligji për Mbikëqyrjen Elektronike të personave, të cilëve u kufizohet lëvizja me vendim të gjykatës, ka mbetur vetëm në sirtar të ministrive.

Gati 9 vite pas, ministrja e Drejtësisë Albulena Haxhiu thotë se ky ligj pritet të nisë së zbatuari para përfundimit të këtij viti. Ajo tha se synojnë të e funksionalizojnë brenda fushatës 16 ditët e aktivizmit kundër dhunës me bazë gjinore.

“Gjatë këtyre ditëve ne presim që të lansojmë edhe mbikëqyrjen elektronike ligj që ka hyrë në fuqi, që nga 2016 por fatkeqësisht nuk ka pasur vullnet për zbatimin e tij”, ka theksuar Haxhiu.

Haxhiu thotë se janë duke pritur që Policinë e Kosovës e Shërbimin Korrektues, për të përfunduar të gjitha trajnimet e nevojshme, por nuk tregoi se në cilën ditë të fushatës do të ndodhë lansimi i këtij sistemi.

“Kemi kërkuar nga Ministria e Punëve të Brendshme që të zbatojë dhe qeveria ka nxjerrë buxhetin për këtë, dhe qeveria ka nxjerr buxhetin, është nënshkruar kontrata që fillimisht kishte dështuar për shkak të një procedure, unë nuk mund të jap më shumë detaje se procesi ka qenë konfidencial, por është mirë se së fundmi kemi arritur, që të nënshkruaj kontratën, pas nënshkrimit pritet trajnimi i stafit, dhe policia është përgjegjëse për mbikqyrjen, sipas ligjit, dhe tash sipas informacioneve që kemi ata po trajtohen, dhe pritet që në kuadër të 16 ditëve të lansohet”, ka deklaruar Haxhiu.

Ndërkohë që Arrita Rezniqi, hulumtuese në IKD, thotë se nuk duhet pritur fushata për të funksionalizuar një sistem kaq të rëndësishëm që do të ndikonte në parandalimin e rasteve të dhunës në familje.

“Çështja e hallkave elektronike është jashtëzakonisht e rëndësishme për sigurinë e grave në Kosovë, e sidomos për viktimat e dhunës në familje dhe dhunës në bazë gjinore dhe është shumë e rëndësishme të realizohet zbatimi i këtij ligji sa më herët, nuk duhet të priten as fushata të caktuara as periudha të caktuara, që ligji është në fuqi qe më shumë se 9 vjet dhe moszbatimi i tij i sjell dëm të madhë grave në Kosovë”, ka deklaruar Rezniqi.

Në kalendarin e aktiviteteve për 16 ditët e aktivizmit kundër dhunës me bazë gjinore, nuk është e paraparë lansimi i një sistemi të tillë.

Të rralla nuk kanë qenë rastet në Kosovë, kur viktimat e dhunës në familje kanë përfunduar të vrara, nga partnerët e tyre.

Sipas një raporti të fundit të UN Women mbi femicidin, shtëpia vlerësohet vendi më i rrezikshëm për gratë. Nga 85 mijë gratë e vrara nga burrat në 2023-n, 60 për qind janë vrarë nga partneri ose familjarë.