Sport Futboll Sport vendor

Taulant Hodaj ndërprenë bashkëpunimin me FFK-në, zbulon arsyet

Para 1 muaji

Ish-avokati dhe ushtruesi i detyrës së Sekretarit të Përgjithshëm të Federatës së Futbollit të Kosovës (FFK), Taulant Hodaj, ka njoftuar ndërprerjen e bashkëpunimit me shtëpinë e futbollit të Kosovës.

Avokati i njohur Taulant Hodaj nuk do të jetë më pjesë e FFK-së, pasi sipas tij ky vendim erdhi pas një sërë ngjarjesh dhe praktikash të përsëritura nga FFK që kanë qenë në kundërshtim me parimet e mia profesionale.

Hodaj ka listuar arsyet në një postim të gjatë në profilin e tij privat në Facebook.

Postimi pa ndërhyrje i Taulant Hodaj

Njoftim për ndërprerjen e bashkëpunimit me Federatën e Futbollit të Kosovës

Me keqardhje, por edhe me ndjenjën e përgjegjësisë profesionale, kam njoftuar sot kryetarin e Federatës së Futbollit të Kosovës për vendimin për përfundim të bashkëpunimit tim si avokat dhe përfaqësues juridik i FFK-së. Ky vendim erdhi pas një sërë ngjarjesh dhe praktikash të përsëritura nga FFK që kanë qenë në kundërshtim me parimet e mia profesionale, veçanërisht në lidhje me pengesat dhe qasjet e ndryshme rreth përfaqësimit të rastit në CAS Lozanë kundër Rumanisë. Besoj se kjo qasje e FFK-së do të dëmtoj shanset e Kosovës për të fituar rastin dhe për të mbrojtur të drejtat dhe reputacionin futbollistëve dhe ekipit kombëtar. FFK-ja është njoftuar për këtë arsyet e tjera kyçe të ndërprerjes së bashkëpunimit.

Gjatë angazhimit tim si avokat i FFK-së, dhe për një periudhë të caktuar edhe si ushtrues i detyrës së Sekretarit të Përgjithshëm, kam dhënë kontribut maksimal për mbrojtjen ligjore të institucionit të FFK-së, ngritjen e kapaciteteve profesionale konform praktikave ndërkombëtare, hartimin e akteve normative dhe përfaqësimin e FFK-së në UEFA dhe FIFA.

Në këtë periudhë:

✔ Zyrat e Sekretarit të Përgjithshëm dhe ato ligjore, të cilat ishin thuajse jofunksionale, janë bërë plotësisht operative.

✔ Asnjë çështje juridike kundër FFK-së nuk është humbur, pavarësisht sfidave të shumta ligjore.

✔ Është përmbyllur me sukses procesi i licencimit, i cili filloi nga një bazë gati jo-ekzistuese.

✔ Janë hartuar Statuti i ri dhe aktet normative, duke shërbyer si model për organizatat e tjera të futbollit.

✔ Është mbrojtur me të gjitha mjetet juridike ri-zgjedhja e kryetarit aktual të FFK.

✔ Kam përfaqësuar denjësisht dhe me profesionalizëm FFK-në pranë institucioneve vendore dhe organizatave ndërkombëtare të futbollit në UEFA dhe FIFA, aq sa kam pas autorizime.

Kosova ka një potencial të jashtëzakonshëm në futboll – lojtarë të talentuar, klube që me përkushtim mbajnë gjallë garat kombëtare dhe përfaqësojnë me krenari vendin tonë në garat ndërkombëtare, si dhe një staf të përkushtuar brenda FFK-së. Ka qenë një privilegj dhe kënaqësi të bashkëpunoj me ta.

Edhe pse nuk do të jem më pjesë e FFK-së, në cilësinë e avokatit dhe ekspertit, do të vazhdoj të jem në krah të futbollistëve, klubeve të futbollit të vendit tonë dhe lojtarëve të Kombëtareve të Kosovës.

Shpresoj dhe dëshiroj që FFK-ja të rritet dhe të forcojë kapacitetet e saj, në mënyrë që futbolli ynë të arrijë sukseset që meriton – për hir të lojtarëve, klubeve dhe vendit tone, i cili ka potencial të jashtëzakonshëm në futboll dhe urgjentisht ka nevojë për një përfaqësim më dinjitoz në arenën ndërkombëtare.