Tahiri: Zgjedhjet e parakohshme në dorën e PDK-së

Politologu Ramush Tahiri, duke i komentuar zërat e ndryshëm që ditëve të fundit lidhur me mundësinë e prishjes së koalicionit të tashëm qeverisëse dhe shkuarjes së vendit në zgjedhje, ka deklaruar kryeministri Kosovës Ramush Haradinaj ka plotësisht të drejtë kur thotë se Kadri Veseli mund ta rrëzojë Qeverinë e Republikës së Kosovës.

“Mjafton të deklarojë tërheqjen nga koalicioni qeverisës ose mjafton po ashtu, si është shprehur figurativisht Kryeministri Haradinaj, t’iu thotë disa deputetëve nga Drenica të mos e përkrahin Qeverinë. Deklaratë të ngjashme ka dhënë edhe zyrtari i lartë i PDK-së pas tryezës së partive politike, që tha se vetëm PDK mund ta çojë vendin në zgjedhje”, tha Tahiri për RTV21.

Ai thotë se Qeverinë Mustafa e rrëzoi partneri kryesor, PDK, pa asnjë paralajmërim por me arsyetim se PDK -së i takon Kryeministri si partisë më të votuar nga populli.

“Pikërisht Kadri Veseli, që hoqi dorë nga pozita e kryeministrit, ishte dhe është përkrahësi kryesor i Ramush Haradinajt dhe i koalicionit, ose thënë kushtimisht të të fortëve, apo të krahut të luftës. Edhe zëvendëskryetari i partisë Enver Hoxhaj kishte deklaruar se është koalicion i natyrshëm dhe se kështu bashkë do të shkojnë edhe në zgjedhjet lokale dhe të tjera dhe do të marrin mbi 60 për qind të votave. Mundet që këto parti po e ndërtojnë platformën e përbashkët për qeverisje afatgjate dhe për marrjen e përgjegjësive të rëndësisë së veçantë, siç janë bisedimet me Serbinë që e veshën me pushtet dhe kompetenca Hashim Thaçin t’i udhëheq dhe që e parapanë në Platformën e propozuar nga Qeveria. Fushatën e vizitave në terren të Kadri Veselit e shoh në këtë vazhdë”, tha ai.

Ndërsa, thotë se, zgjedhjet PDK i provokon në momentin që e vlerëson se partitë kundërshtare LDK e Vetëvendosje janë në krizë dhe e kanë të zvogëluar përkrahjen e qytetarëve.

Politologu Tahiri duke folur për fenomenin e prishjes së koalicionit qeverisës gjatë viteve të kaluara, ka nxjerr edhe një rast nga e kaluara.

“Nga mësimet e së kaluarës e dimë se edhe pse ishin bashkë në Nju Jork në Asamblenë e Përgjithshme të OKB, me tu kthyer Hashim Thaçi që në Aeroportin e Prishtinës, në konferencën e shtypit deklaroi se nuk ka bashkëpunim me shkelësit e Kushtetutës, duke e nxitur kështu Fatmir Sejdiun të jap dorëheqje nga pozita e Presidentit të Kosovës e jo nga pozita e Kryetarit të LDK-së, gjë që provokoi zgjedhjet e parakohshme parlamentare me tërheqjen e LDK nga Qeveria. Gjithashtu edhe diskutimi i Enver Hoxhajt në Kuvend, kur tha se si PDK janë të pakënaqur me performancën e Qeverisë Mustafa, bëri që mocioni i votëbesimit të Qeverisë i nisur nga një parti minore të ketë sukses të plotë.”

Duke folur rreth tryezës se thirrur nga PDK, Tahiri tha se “Tryeza mbahet, sepse është debat që nuk varet kush e thirrë dhe kush e udhëheq,  por çka merren vesh”.

“Tryeza me rotacion vetëm e shpenzon kohën deri në vendimin për mbajtjen e zgjedhjeve të parakohshme. Për këtë ka duket pajtim te gjitha partive që mos me pas zgjedhje këtë vit që po i konvenon edhe koalicionit qeverisës që po i vendosin njerëzit e partive në institucione në të gjitha nivelet, duke i mbledhë kështu përkrahësit në votat klienteliste të tyre, llogaritin në zgjedhje”.

Ndërkaq, duke e komentuar kërcënimin e Haradinajt se do t’i shkarkojë ministrat nëse vazhdojnë të mungojnë,  Tahiri tha se kryeministri nuk mundet t’i shkarkojë ata, sepse është kryeministër i pakicës parlamentare dhe për ministrat e Qeverisë përgjegjësinë e mbajnë partitë e koalicionit, secila për ministrat e vet.

“Pra i shkarkon ai që i ka propozuar.  Pacolli ata të AKR-së, Limaj ata të NISMA-s…”, tha ai.