Studiuesi i OpenAl gjendet i vdekur në San Francisko, dyshohet për vetëvrasje

Një ish-studiues i OpenAI është gjetur i vdekur në një apartament në San Francisko.

Trupi i Suchir Balaji, 26 vjeç, u zbulua më 26 nëntor pasi policia tha se mori një telefonatë që u kërkonte të kontrollonin për mirëqenien e tij.

Bëhet e ditur se zyra e ekzaminuesit mjekësor në San Francisko përcaktoi vdekjen e tij si vetëvrasje.

Në muajt e fundit, Balaji kishte folur publikisht kundër praktikave të kompanisë OpenAI, e cila ka luftuar një sërë padish në lidhje me praktikat e saj të mbledhjes së të dhënave, shkruan BBC, përcjell Telegrafi.

Në tetor, New York Times publikoi një intervistë me Balaji, në të cilën ai pretendonte se OpenAI kishte shkelur ligjin amerikan për të drejtat e autorit ndërsa zhvillonte chatbotin e tij të njohur në internet, ChatGPT.

Artikulli thoshte se pasi punoi në kompani për katër vjet si studiues, Balaji kishte arritur në përfundimin se “përdorimi i të dhënave me të drejtë autori nga OpenAI për të ndërtuar ChatGPT shkelte ligjin dhe se teknologjitë si ChatGPT po dëmtonin internetin”.

Siç raportohet, Balaji u largua nga kompania në gusht, duke deklaruar për New York Times se që atëherë kishte punuar në projekte personale.

Ndryshe, ai u rrit në Cupertino, Kaliforni, përpara se të shkonte për të studiuar Shkenca Kompjuterike në Universitetin e Kalifornisë, Berkeley.

Një zëdhënës i OpenAI tha në një deklaratë se ishte “i shkatërruar kur mësoi për këtë lajm tepër të trishtuar dhe zemra e tij është me të dashurit e Suchir gjatë kësaj kohe të vështirë”. /Telegrafi/