Spektakël golash në Podujevë, Llapi mposhtë Feronikelin dhe i ik zonës së rrezikshme

Llapi ka marrë një fitore të madhe në shtëpi, teksa ka mposhtur Feronikelin me rezultat të ngushtë 3:2.

Skuadra e Tahir Batatinës e nisi për mrekulli ndeshjen, ku në minutën e 22-të kaluan në epërsi me golin e Bujar Idrizit.

Vetëm 12 minuta më vonë, Llapi shënoi edhe golin e dytë, kur Arbnor Ramadani asistoi për mrekulli te Sava Gardasevic i cili realizoi një gol të bukur për 2-0.

Kur skuadrat po bëheshin gati të shkonin në pushim, Marko Simonovski i Niklit ngushtoi epërsinë në 2-1.

Llapi vazhdoi lojën e mirë edhe në pjesën e dytë, teksa kur kaluan një orë lojë fitoi penallti.

Valmir Veliu u ndalua në zonë nga Adem Maliqi, teksa i saktë nga pika e bardhë ishte Arbnor Ramadani duke ngritur epërsinë e skuadrës së tij në 3-1.

Feronikeli u rikthye në lojë 16 minuta para fundit të ndeshjes, kur sulmuesi maqedonas Simonovski realizoi një tjetër gol për ta ngushtuar epërsinë në 3-2.

Përkundër insistimit nga mysafirët për ta barazuar rezultatin, një gjëje të tillë nuk ia arritën dhe Llapi mori tri pikë të arta nga kjo ndeshje.

Me fitoren e sotme, Llapi i ik pozitës së rrezikshme dhe tani ndodhet në vendin e gjashtë me 20 pikë.

Ndërkohë Feronikeli është një pozitë më lart me tri pikë më shumë. /Telegrafi/