Spartak Ngjela: Sali Berisha dje shpalli luftën e dytë kundër SHBA-së

Politikani dhe avokati Spartak Ngjela përmes një analize shprehet se ditën e djeshme ish- kryeministri Sali Berisha i shpalli luftën e dytë SHBA-ve pas asaj që bëri në vitin 1997.

Ngjela shkruan se në vitin 1997 Berisha shprehej se Shtëpia e Bardhe është pushtuar nga një komunist dhe e kishte fjalën për Bill Klintonin.

“Vjen një çast kur urrejtja që ke kundrejt superiorëve në qytetërim, të çon në luftë me gjigantin…

Që është asgjësimi yt.

E pra, Sali Berisha dje shpalli luftën e dytë kundër SHBA-se.

Në luftën e parë qe e shpalli ne vitin 1997, përfundoi si mos më keq. Po në këtë të dytën?

Pyesni përkrahësit e tij mendjeshkurtër të luftës së parë…

Po do ketë përkrahës antiamerikanë në Parlament nga grupi i PD?

Deri tani është vetëm Basha. Të shohim. Por beteja në Parlament është e humbur. Shikoni se çfarë politike mediokër që bëjnë në kundërshtim të Reformës Berisha dhe Basha: kërkojnë të bindin autorin(amerikanët) se shkruesi i reformës, që është politika amerikane mirëfilli, është Edi Rama.

Saliu ka frikë të dalë hapur, se e lënë ushtarët e tij. Po pse, a thua se i gënjen dot kështu deputetët politikanë të Partisë Demokratike? Po aleatët? Naivitet provincial që vjen nga mendja e vobegtë që mendon se, për faktin që di të gënjej fshatin tim, unë mund të gënjej të gjithë botën. Pse, politika amerikane do deklarojë se Shtëpia e Bardhë e humbi luftën për demokracinë në Shqipëri së ù mund nga Sali Berisha? Kjo është pamundësi absolute.

Por nesër e tutje do shihni se si tragjedia që ka imponuar Berisha në evolucionin demokratik shqiptar, do të kthehet në komedi, kur të dëgjoni retorikën qesharake që do të përdorë Saliu kur politika e lartë amerikane të deklarojë se, “vota kundër Reformës në Parlamentin shqiptar është votë kundër Amerikës”. Do dëgjoni përrallat e vjetra si ato që Saliu deklaronte në Këshillin Kombëtar të PD në vitin 1997, kur, midis të tjerash, tha se “Shtëpia e Bardhe është pushtuar nga një komunist”…dhe e kishte fjalën për Bill Klintonin.

Tërhiqu Sali sa nuk është vonë! se je në preludin e marrëzisë së dytë politike. Por në të parën ishe në pushtet…kurse tani je në rrugë të madhe”, shkruan Ngjela.