Spanja do t’i regjistrojë njerëzit që refuzojnë të vaksinohen kundër COVID-19

Autoritetet spanjolle do të mbajnë një regjistër të njerëzve që refuzojnë vaksinimin kundër coronavirusit dhe do t’i ndajnë të dhënat me vendet e tjera evropiane.

Sidoqoftë, të dhënat nuk do të publikohen në publik, njoftoi sot Ministria e Shëndetësisë.

Ministri Salvador Illa deklaroi se është e rëndësishme që qytetarët të vaksinohen kundër COVID-19, megjithëse vaksinimi që ka filluar në shumë vende të Bashkimit Evropian (BE), nuk është i detyrueshëm.

“Ne do të krijojmë një regjistër të njerëzve që nuk e duan vaksinën dhe do ta ndajmë me vendet e tjera evropiane”, tha Illa, duke shtuar se do të ketë njerëz në regjistër të cilëve u është ofruar vaksina, por që e kanë refuzuar atë.

Sipas tij, regjistri nuk është një dokument që do të paraqitet në publik dhe mbrojtja e të dhënave do të merret parasysh.

Qeveria Spanjolle ka në plan të vaksinojë rreth 2.5 milionë njerëz deri në fund të shkurtit dhe midis 15 dhe 20 milionë deri në verë.

Në atë vend, rreth 50 mijë njerëz vdiqën nga coronavirusi, ndërsa 1.8 milionë ishin të infektuar. /Telegrafi/