Spanja heq poshtë akuzat për rebelim kundër ish-udhëheqësit katalanas

Një gjykatë spanjolle ka hedhur poshtë akuzat për rebelim kundër ish-presidentit katalanas, Carles Puigdemont për rolin në organizimin e referendumit të pavarësisë në vitin 2017 që e zhyti shtetin spanjoll në një krizë të madhe politike.

Gjyqtari i Gjykatës së Lartë, Pablo Llarena hodhi poshtë gjithashtu akuzat për rebelim kundër katër separatistëve katalanas të përfshirë në trazirat e vitit 2017 për shkak të ndryshimeve në ligjin e rebelimit të Spanjës që hynë në fuqi dhe që nënkuptojnë se ligji nuk mbulon më krimet e tyre të supozuara.

Megjithatë, gjyqtari nuk i hodhi poshtë akuzat për përvetësim dhe mosbindje, kështu që Puigdemont dhe bashkëpunëtorët e larguar nga vendi pesë vjet më parë do të gjykohen nëse ai kthehet, por për krime për të cilat parashikohet një dënim më i ulët, raporton politico.

Puigdemont jeton në Belgjikë, ku është anëtar i Parlamentit Evropian. Përpjekjet e qeverisë spanjolle për ta ekstraduar deri më tani kanë qenë të pasuksesshme dhe është e paqartë nëse ndryshimet e bëra nga gjykata mund të rrisin shanset që zyrtarët belgë ta kthejnë atë.

Ligjvënësit spanjollë miratuan muajin e kaluar reformat e diskutueshme për trajtimin e krimeve të rebelimit dhe përvetësimit në një lëvizje të koalicionit qeverisës të qendrës së majtë të Spanjës për të mbajtur mbështetjen parlamentare për partinë pro-pavarësisë katalane dhe për të lehtësuar tensionet në rajonin e pasur verilindor.

Nëntë separatistë katalanas janë dënuar me nga nëntë deri në 13 vjet burg për rolin e tyre në organizimin e referendumit të pavarësisë në vitin 2017. Ata u falën në korrik të këtij viti pasi kaluan tre vjet prapa grilave, por Puigdemont nuk u fal, sepse u arratis prej Spanjës. /Telegrafi/