Singapori ka vaksinuar 84 për qind të popullatës dhe i është rikthyer masave të rrepta, por vazhdon të ketë shifra rekord të rasteve të reja

Rastet ditore me coronavirus në Singapor javëve të fundit kanë arritur shifra të reja rekord, duke tejkaluar numrin prej 5.000.

Ministria e Shëndetësisë e ka përshkruar si “një rritje të pazakontë”, derisa numri i rasteve të reja ditore është i madh, autoritet po e përcjellin me vëmendje numrin e atyre që janë të sëmurë rëndë dhe kërkojnë trajtim në repartet e kujdesit intensiv.

Spitalet në këtë shtet po ballafaqohen me numrin e madh të pacientëve që janë infektuar me COVID-19. Gjithashtu po ballafaqohen edhe me mungesë të stafit, transmeton Telegrafi.

E për ta tejkaluar edhe këtë sfidë, Singapori ka aplikuar masa të rrepta siç është kufizimi i tubimeve mbi dy persona. Megjithatë, ky vend po vazhdon ta mendojë idenë e lirimit të masave. Fillimisht nga këto masa janë liruar pasagjerët e vaksinuar kundër COVID-19 që vijnë nga 10 vendet përfshirë SHBA dhe Britaninë e Madhe.

E lista e vendeve do të zgjerohet së shpejti duke e futur edhe Korenë e Jugut, Australinë dhe Zvicrën.

Nga fillimi i pandemisë, Singapori ka regjistruar mbi 200.000 raste me COVID-19. Gati gjysma e tyre vetëm gjatë vjeshtës, që është një dëshmi se është përhapur varianti më infektues – Delta.

“Për dallim nga variantet tjera, duket se Delta po godet më rëndë”, tha Leo Yee Sin, drejtori i përgjithshëm i Qendrës Kombëtare për Sëmundje Ngjitëse.

Ai madje ka theksuar se pacientët e infektuar me variantin Delta, pësojnë më shpesh ndezje të mushkërive dhe se kanë nevojë më shumë për oksigjenoterapi.

Dale Fisher, profesor në fakultetin e mjekësisë Yong Loo Lin, ka thënë se kjo rritje e rasteve sipas tij ishte e pritshme.

“Pavarësisht që vaksinimi luan rol të madh në parandalimin e sëmundjeve të rënda, ato nuk mbrojnë nga simptomat e lehta apo ata asimptomatik”, tha ai për This Week in Asia.

“Të gjitha vendet duhet të presin rritje të numrit të rasteve të reja, pasi që edhe masat anti-COVID janë zbutur në mbarë botën. Delta do të thotë se rritja e rasteve të reja do të jetë më prezente si te ata që janë vaksinuar por edhe te ata që nuk e kanë marrë as edhe një dozë”, shtoi Fisher.

Alex Cook, profesor në fakultetin e Shëndetit Publik, sugjeron se zbutja e masave, mos gjurmimi i rasteve të kontaktit, heqja e masës së karantimit, kanë sjellë këtë valë të re.

“Shumica e të infektuarve në Singapor po shërohen nëpër shtëpi, e me zbutjen e masave ekziston mundësia më e madhe që të infektojnë edhe familjarët apo miqtë e tyre”, shtoi ai.

Rreth 98 për qind të pacientëve me coronavirus në Singapor kanë simptoma të lehta apo nuk kanë fare, gjë që autoritetet kompetente po e shohin si një tregues pozitiv.

Singapori është një prej vendeve me përqindjen më të madhe në botë të vaksinuarve. Rreth 84 për qind prej 5.4 milionë banorëve janë vaksinuar me dy dozat. E afro 16 për qind kanë marrë dozën shtesë (të tretë apo përforcuese).

Kryeministri Lee Hsien Loong, ka thënë se autoritet po tregohen të kujdesshme nga frika se mund të ketë “befasi” – duke theksuar se rastet në Evropën Perëndimore janë në rritje e sipër.

“Kjo mund të na ndodh edhe neve”, tha ai para mediave gjatë Samitit të G20-së në Romë të Italisë.

Gjithashtu, Singapori është një prej vendeve me përqindjen më të ulët të vdekjeve në botë nga COVID-19, me vetëm 0.2 për qind. /Telegrafi/